პარლამენტის თვითმმართველობის კომიტეტის თავმჯდომარე ირაკლი ქადაგიშვილი ოპოზიციურ პარტიებში მიმდინარე პროცესებს აფასებს. მისი განცხადებით, ოპოზიციის მიერ არჩეული პოლიტიკური კურსი, რომელიც, მისი თქმით, ქვეყნის წინააღმდეგ იყო მიმართული, ახლა უკვე შიდა დაპირისპირების სახით უბრუნდებათ.

ქადაგიშვილის შეფასებით, ოპოზიციურ ფლანგზე არსებული „ანტიპოლიტიკა“ გარდაუვალად შიდა დესტრუქციაში გადაიზარდა. მმართველი გუნდის წარმომადგენელი მიიჩნევს, რომ ეს პროცესი არ დასრულდება და სამომავლოდ კიდევ უფრო გამწვავდება.

„ის ანტიპოლიტიკა და დესტრუქცია, რომელიც ქართულმა ოპოზიციამ საქართველოს წინააღმდეგ აწარმოა, შიდა დესტრუქციაში გადაიზარდა. ამიტომ, მოლოდინია, რომ ეს პროცესი კიდევ უფრო გამწვავდება და გამძაფრდება“, — განაცხადა ირაკლი ქადაგიშვილმა.

3 ფოტო — დააჭირე გასადიდებლად

დეპუტატის თქმით, არსებული დაპირისპირება პიროვნულ ჭრილშია გადასული. ქადაგიშვილი კონკრეტულ მაგალითად მიხეილ სააკაშვილისა და ნიკა მელიას პოლიტიკურ ურთიერთობებს ასახელებს და ამბობს, რომ ოპოზიციური ლიდერების „ეგოების ბრძოლა“ ამ კრიზისის მთავარი განმაპირობებელი ფაქტორია.

„პიროვნული დაპირისპირებაც სწორედ ამის გამოხატულებაა. სააკაშვილსა და მელიას თავიანთი ეგო აქვთ და ახლა სწორედ ამ ეგოების ბრძოლას ვხედავთ“, — აღნიშნა ქადაგიშვილმა.

მმართველი გუნდის წარმომადგენლის ეს განცხადება ოპოზიციურ პარტიებში ბოლო დროს გამძაფრებულ კრიტიკასა და შიდაპარტიულ განხეთქილებებს უკავშირდება, რაც, მისი თქმით, ოპოზიციის პოლიტიკური სისუსტის ნიშანია.