ჯანდაცვის მინისტრმა მიხეილ სარჯველაძემ დიუშენის კუნთოვანი დისტროფიის სამკურნალო მედიკამენტების საკითხზე მნიშვნელოვანი განცხადება გააკეთა. მისი თქმით, სახელმწიფო მზად არის, პაციენტების უსაფრთხოების გარანტიების პირობებში, ნებისმიერი ღირებულების მედიკამენტი შეიძინოს.

მინისტრმა აღნიშნა, რომ დაავადებული ბავშვების მშობლებთან ერთად უკვე შერჩეულია კონკრეტული მედიკამენტები, თუმცა მათი დასახელებისგან ჯერჯერობით თავს იკავებს. „იქ, სადაც უსაფრთხოებასთან დაკავშირებით კითხვის ნიშნები მინიმიზირებულია, პრემიერმაც აღნიშნა, რომ რაც არ უნდა იყოს მედიკამენტის ღირებულება, სახელმწიფო არ დაიხევს უკან“, — განაცხადა სარჯველაძემ.

პრემიერ-მინისტრმა ირაკლი კობახიძემ 4 ივნისს დაადასტურა, რომ ხელისუფლება მშობლებთან შეთანხმებულ მედიკამენტების შესყიდვაზე მუშაობას იწყებს. ამ მიზნით შეიქმნება სპეციალური სამუშაო ჯგუფი, რომელიც ჯანდაცვის სამინისტროს წარმომადგენლებისა და მშობლებისგან შედგება. საბოლოო გადაწყვეტილება კი ფარმაცევტული კომპანიების შემოთავაზებების საფუძველზე მიიღება.

დიუშენის კუნთოვანი დისტროფია იშვიათი და მძიმე გენეტიკური დაავადებაა, რომელიც კუნთების შეუქცევად დაზიანებას იწვევს. საქართველოში ამ დიაგნოზის მქონე 100-მდე ბავშვია. მათი მშობლები უკვე ორი წელია, სახელმწიფოსგან FDA-ის მიერ დამტკიცებული ოთხი ტიპის მედიკამენტის დაფინანსებას მოითხოვენ.

მოთხოვნილი პრეპარატების ჩამონათვალშია „ჯივინოსტატი“, „ვამოროლონი“, ეგზონ-სქიფინგის თერაპიები და გენური თერაპია „ელევიდისი“. თითოეულ მათგანს დაავადების მართვის განსხვავებული მექანიზმი აქვს. მაგალითად, „ჯივინოსტატი“ ამცირებს დაავადების პროგრესირებას, ხოლო „ელევიდისი“ ერთჯერადი გენური ინფუზიაა, რომელიც მიზნად ისახავს მიკრო-დისტროფინის გამომუშავების ხელშეწყობას.

ვადებთან დაკავშირებით მინისტრი სიფრთხილეს იჩენს. სარჯველაძის თქმით, პროცესი მხოლოდ სამინისტროზე არ არის დამოკიდებული, რადგან საჭიროა მოლაპარაკებები საერთაშორისო ორგანიზაციებთან. თუმცა, ის გვპირდება, რომ გადაწყვეტილებები მაქსიმალურად სწრაფად, პაციენტების ინტერესების გათვალისწინებით იქნება მიღებული.