ჩრდილოეთ ისრაელში მდებარე სამხედრო-საჰაერო ძალების ბაზაზე ირანული ბალისტიკური რაკეტის ნამსხვრევები ჩამოვარდა. ინფორმაციას ისრაელის სამხედრო წყაროებზე დაყრდნობით CNN ავრცელებს.

ირანის ისლამური რევოლუციის გუშაგთა კორპუსი (IRGC) აცხადებს, რომ სამიზნე რამათ დავითის ავიაბაზა იყო. მათ სახელმწიფო მედიის საშუალებით გაავრცელეს ვიდეომასალა, სადაც, მათი მტკიცებით, რაკეტების გაშვების პროცესია აღბეჭდილი.

3 ფოტო — დააჭირე გასადიდებლად

ისრაელის მხარე ადასტურებს, რომ ბაზის ერთ-ერთ ნაგებობას რაკეტის ნამსხვრევმა მიაღწია, თუმცა უარყოფს ინფორმაციას უშუალოდ რაკეტის პირდაპირი დარტყმის შესახებ.

ამ დროისთვის ისრაელის თავდაცვის ძალები (IDF) ინციდენტის ადგილზე მუშაობს. ექსპერტები სწავლობენ, თუ რა მასშტაბის ზიანი მიადგა სამხედრო ობიექტს და რამდენად არის დაზიანებული ინფრასტრუქტურა.

ვითარება ახლო აღმოსავლეთში კვლავ დაძაბულია, რაც რეგიონული უსაფრთხოების მყიფე ბალანსზე პირდაპირ აისახება.

ოფიციალური თელ-ავივი შემთხვევის შედეგების დეტალურ ანალიზს ატარებს, რათა დადგინდეს, ჰქონდა თუ არა ადგილი თავდაცვის სისტემების გარკვეულ შეფერხებას.