ჟურნალისტი ჯაბა ხუბუა სოციალურ ქსელ X-ზე „ნაციონალური მოძრაობის“ შიდაპარტიულ პროცესებს აკრიტიკებს. მისი თქმით, მიხეილ სააკაშვილის მიერ პარტიის თავმჯდომარის პოსტზე თინა ბოკუჩავას ნაცვლად ნანუკა ჟორჟოლიანის კანდიდატურის განხილვა პოლიტიკური დამცირების ტოლფასია.

ისტორიული პარალელები: დევი ჭანკოტაძის შემთხვევა

ხუბუა 2024 წლის საპარლამენტო არჩევნებს იხსენებს, როდესაც „ნაციონალურმა მოძრაობამ“ წყალტუბოს, ბაღდადის, ხონისა და ვანის მაჟორიტარობის კანდიდატად გენერალი დევი ჭანკოტაძე წარადგინა. პოლიტიკური კამპანია უკვე დაწყებული იყო, თუმცა მოულოდნელად კანდიდატი შეცვალეს.

„გენერალი ჭანკოტაძე უცებ ნანუკა ჟორჟოლიანით ჩაანაცვლეს. ჩამოხსნეს პლაკატები და ბილბორდები, ხოლო შეიარაღებული ძალების გაერთიანებული შტაბის ყოფილი უფროსის ადგილას სოდ-ის ყოფილი უფროსის ყოფილი ცოლი გამოაკრეს“, — წერს ჯაბა ხუბუა.

ბოკუჩავას გამოცდა

ჟურნალისტი ხაზს უსვამს, რომ გენერალმა ჭანკოტაძემ აღნიშნული გადაწყვეტილება გააპროტესტა, თუმცა პარტიაში დარჩენა არჩია. ახლა კი, ხუბუას აზრით, ანალოგიური გამოცდის წინაშე თინა ბოკუჩავა დგას.

„საინტერესოა, პატიმარ სააკაშვილის მიერ ნანული ჟორჟოლიანით ჩანაცვლებულ თინა ბოკუჩავას აღმოაჩნდება თუ არა გენერალ დევი ჭანკოტაძეზე მეტი თავმოყვარეობა და გადაყლაპავს თუ არა ამ დამცირებას?“

ხუბუა დასძენს, რომ საზოგადოებისთვის ნათელი გახდება, თუ რა არის პრიორიტეტული მოქმედი თავმჯდომარისთვის: ღირსება თუ პარტიული თანამდებობა, რომელიც, მისი თქმით, გარკვეულ მატერიალურ სარგებელთანაა დაკავშირებული.