საქართველოს პარლამენტის თვითმმართველობის კომიტეტის თავმჯდომარე ირაკლი ქადაგიშვილი ევროკავშირის მხრიდან უვიზო მიმოსვლის შესაძლო შეჩერების საკითხს ეხმაურება. მისი თქმით, მსგავსი გადაწყვეტილება არა ობიექტურ კრიტერიუმებს, არამედ პოლიტიკურ ზეწოლას უკავშირდება.

ქადაგიშვილის განცხადებით, საქართველოს ევროკავშირთან მიმართებით ეროვნული ინტერესების დაცვის სრული უფლება აქვს. მისი შეფასებით, თუ ევროპული სტრუქტურები სანქციების ან შეზღუდვების გზას აირჩევენ, ისინი საკუთარი გავლენის ბოლო ბერკეტს დაკარგავენ.

3 ფოტო — დააჭირე გასადიდებლად

„ევროკავშირმა უნდა გადაწყვიტოს, საქართველოსთან მიმართებით თვალდახუჭვის რეჟიმში დარჩება, თუ რეალობას შეხედავს. კონტრპროდუქტიულია ის ლოზუნგები, რომლებიც ქვეყანაში სიტუაციის დესტაბილიზაციისკენ არის მიმართული“, — განაცხადა ქადაგიშვილმა.

პარლამენტარი მიიჩნევს, რომ სავიზო რეჟიმის შეჩერების შესახებ საუბარი ევროპული იდეის დამაზიანებელია. მისი თქმით, ოპოზიციის მოწოდებები სანქციების დაწესების შესახებ მიზნად ქვეყანაში ეკონომიკური წინსვლის შეჩერებას ისახავს.

„თუ მათ აქვთ უნარი, თავიანთი სუბიექტური განწყობა ობიექტურისკენ შეცვალონ, მაშინ სავიზო რეჟიმის შეჩერებაზე საუბარი არ უნდა იყოს. ეს არის ინსტრუმენტი, რომლითაც ცდილობენ ქვეყნის შიგნით დაძაბულობა შექმნან“, — დასძინა დეპუტატმა.

ქადაგიშვილი ხაზს უსვამს, რომ საქართველო არავის ებრძვის და ევროკავშირში გაწევრიანების გზა ქვეყანას საკუთარი ეროვნული ინტერესების დაცვის უფლებას არ უზღუდავს. მისი პოზიციით, ევროპელმა პარტნიორებმა უნდა შეწყვიტონ ამ საკითხის პოლიტიკურ ბერკეტად გამოყენება და გადავიდნენ ობიექტური განსჯის რეჟიმზე.