2 ფოტო — დააჭირე გასადიდებლად

საქართველოში, სადაც საპროტესტო აქციებში მონაწილეობა სულ უფრო მეტ ფინანსურ თუ სამართლებრივ რისკთან ასოცირდება, სტუდენტურმა მოძრაობამ წინააღმდეგობის ალტერნატიული გზა გამონახა. მაისის ბოლოს, 100-საათიანმა უწყვეტმა ონლაინ მარათონმა დიუჩენის დისტროფიით დაავადებული ბავშვების დასახმარებლად 100 000-ზე მეტი ადამიანი გააერთიანა.

დიუჩენის დისტროფია მძიმე გენეტიკური დაავადებაა, რომელიც კუნთების პროგრესირებად სისუსტეს იწვევს. ბავშვების მშობლები თვეების განმავლობაში ითხოვდნენ ისეთ მედიკამენტებზე წვდომას, როგორიცაა „გივინოსტატი“ და „ვამოროლონი“. მიუხედავად იმისა, რომ მათ მთავრობის ადმინისტრაციასთან 45 ღამე გაათენეს, მათი მოთხოვნები უყურადღებოდ რჩებოდა.

აქტივისტმა ლილე მშვენიერაძემ, რომელიც „Protect Iliauni“-ს წევრია, განმარტა, რომ კამპანიის თავდაპირველი მიზანი 100 000 ლარის შეგროვება იყო. თანხა ოჯახებს სპეციალიზებული საწოლების, სასუნთქი აპარატებისა და სხვა აუცილებელი აღჭურვილობის შეძენაში უნდა დახმარებოდა. მალევე, კამპანია „ერთი ლარი ბავშვებისთვის“ მასშტაბურ სახალხო მოძრაობად იქცა.

პრემიერ-მინისტრმა ირაკლი კობახიძემ მანამდე განაცხადა, რომ სახელმწიფოსთვის დამატებითი მილიონების დახარჯვა „რაციონალური“ არ იქნებოდა და ეჭვი შეიტანა მედიკამენტების ეფექტიანობაში. საზოგადოების პასუხი ამ განცხადებაზე ცალსახა იყო: დონაციების ტემპმა წუთში 800 ლარს მიაღწია.

თაკო გოგალაძემ, რომლის შვილსაც დიუჩენის დაავადება აქვს, აღნიშნა, რომ საზოგადოების მხარდაჭერა მათთვის მოულოდნელი და ემოციური იყო. მიუხედავად სამთავრობო მედიის მცდელობისა, კამპანია პოლიტიკურ პროვოკაციად წარმოეჩინათ, ხალხის ჩართულობა არ შემცირებულა.

ბოლო წლებში საპროტესტო აქციების მონაწილეებზე დაკისრებულმა ჯარიმებმა და ადმინისტრაციულმა პატიმრობებმა ქუჩის აქტივიზმი შეასუსტა. თუმცა, ამ მარათონმა შექმნა უსაფრთხო სივრცე სამოქალაქო აქტივობისთვის. 100-საათიანი ლაივსტრიმის დასრულების შემდეგ, შეგროვებულმა თანხამ 2 მილიონ ლარს გადააჭარბა.

პოლიტოლოგ კორნელი კაკაჩიას შეფასებით, ეს კამპანია ადასტურებს, რომ ქართული საზოგადოება არ ნებდება. მისი თქმით, ახალგაზრდები ეძებენ გზებს, რათა დაამტკიცონ, რომ პოლიტიკური ელიტის მიღმაც არსებობს სამოქალაქო ძალა. მარათონი გახდა სიგნალი იმისა, რომ საზოგადოებას მობილიზაციის უნარი კვლავ აქვს.

კამპანიის წარმატებამ შედეგი გამოიღო: 4 ივნისს მთავრობამ განაცხადა, რომ მედიკამენტების შესყიდვის პროცედურებს იწყებს. თუმცა, როგორც მშობლები ამბობენ, ყველაზე დიდი მიღწევა სწორედ საზოგადოების სოლიდარობა და ბავშვებისთვის დამატებითი სიცოცხლის წლების მოპოვებაა.