თბილისის მერი კახა კალაძე აშშ-სთან ურთიერთობების გადატვირთვის პერსპექტივას აფასებს. მისი თქმით, საქართველოს ხელისუფლება მზად არის, ვაშინგტონთან თანამშრომლობა ახალი ფურცლიდან დაიწყოს, თუმცა ეს პროცესი აუცილებლად სამართლიანობის პრინციპებზე უნდა აიგოს.

კალაძის განცხადებით, ჯო ბაიდენის ადმინისტრაციის პოლიტიკა საქართველოს მიმართ არასწორი იყო. შესაბამისად, ის იმედოვნებს, რომ პრეზიდენტ დონალდ ტრამპის ხელმძღვანელობით მოქმედი ახალი ადმინისტრაცია არსებულ ხარვეზებს გამოასწორებს.

„მზად ვართ ამერიკასთან განახლებული ურთიერთობებისთვის. პრემიერ-მინისტრმა დელეგაციასთან შეხვედრისას ჩვენი გუნდის პოზიცია ღიად დააფიქსირა. ჩვენ გვჭირდება მკაფიო გზამკვლევი, რომელიც სამართლიანობაზე იქნება დაფუძნებული“, - განაცხადა კალაძემ.

3 ფოტო — დააჭირე გასადიდებლად

თბილისის მერმა ხაზი გაუსვა, რომ საქართველოს ხელისუფლება კვლავ გააგრძელებს ეროვნული ინტერესების დაცვას. მისი განმარტებით, ეს კურსი პირდაპირ უკავშირდება ქვეყანაში მშვიდობის შენარჩუნებას, რაც მმართველი გუნდის მთავარი პრიორიტეტია.

არსებული გეოპოლიტიკური ვითარების ფონზე, კალაძემ აღნიშნა, რომ რეგიონში და მსოფლიოში მიმდინარე კონფლიქტები ეკონომიკურ გამოწვევებს აძლიერებს. მისი თქმით, საქართველოს მთავრობა ყველაფერს გააკეთებს იმისთვის, რომ დაიცვას ხალხის ინტერესები და თავიდან აიცილოს დაძაბულობის ესკალაცია.

„მსოფლიოში დაძაბული სიტუაციაა. ჩვენი სურვილია, რაც შეიძლება მალე დასრულდეს ომი და კონფლიქტები. ჩვენ ყოველთვის იმ პოლიტიკას გავატარებთ, სადაც საქართველოს და ჩვენი მოქალაქეების ინტერესები იქნება გათვალისწინებული“, - დასძინა თბილისის მერმა.