„ჰადსონის ინსტიტუტის“ მიერ გამოქვეყნებული ანგარიში, რომელიც საქართველოში ირანის ისლამური რესპუბლიკის მზარდ გავლენებს ეხება, პოლიტიკური დისკუსიის საგანი გახდა. კვლევის ერთ-ერთი ავტორი, გიორგი კანდელაკი, ანგარიშის მიმართ გამოთქმულ კრიტიკას ეხმაურება და აცხადებს, რომ პრობლემა არა თავად რეპორტში, არამედ იმ რეალურ ფაქტებშია, რომელიც დოკუმენტშია მოყვანილი.

პრობლემა, რომელიც ხელისგულზეა

კანდელაკის თქმით, საზოგადოების ნაწილში ანგარიშის მიმართ გამოხატული სკეპტიციზმი, რომელიც „ფაქტების არარსებობაზე“ აპელირებს, მიზანმიმართული პროპაგანდის ნაწილია. მისი შეფასებით, ირანის რეჟიმის გავლენების გაჯეჯილება საქართველოში იმდენად თვალსაჩინოა, რომ მისი უგულებელყოფა შეუძლებელია.

„ირანის რეჟიმის გავლენა ჩვენს ქვეყანაში ასე გაჯეჯილებული რომაა, ნამდვილად რთულად დასაჯერებელია, თან ამხელა რეპორტის კითხვაც ყველას ეზარება. „არც ერთი ფაქტი არ არის“, ნარატივს პროპაგანდამ, ალბათ, ამიტომაც ჩააჭირა“, — აცხადებს კანდელაკი.

სამართლებრივი რეაგირების აუცილებლობა

ავტორის განმარტებით, ანგარიშში წარმოდგენილი მონაცემები სცდება აკადემიური დისკუსიის ფარგლებს და რეალურ სამართლებრივ რეაგირებას მოითხოვს. ის ხაზს უსვამს, რომ ქვეყნის უსაფრთხოების ინტერესებიდან გამომდინარე, აუცილებელია ირანის მხრიდან მომდინარე გავლენების სათანადო შეფასება და შესაბამისი პოლიტიკური თუ სამართლებრივი ნაბიჯების გადადგმა.

კანდელაკი აღნიშნავს, რომ კვლევის მიზანი სწორედ ამ საფრთხეების იდენტიფიცირება იყო, რათა საზოგადოებასა და გადაწყვეტილების მიმღებ პირებს მკაფიო წარმოდგენა ჰქონოდათ იმ გამოწვევებზე, რომელთა წინაშეც საქართველო დგას.