საქართველოს პრემიერ-მინისტრმა და „ქართული ოცნების“ თავმჯდომარემ, ირაკლი კობახიძემ სამთავრობო ადმინისტრაციაში გამართული ბრიფინგი პარტიის საპატიო თავმჯდომარის, ბიძინა ივანიშვილის საქმიანობის შექებას დაუთმო. პრემიერმა საკუთარ თავს პარტიაში „მეორე პირი“ უწოდა, რითაც ირიბად დაადასტურა, რომ მმართველ გუნდში გადაწყვეტილებების მიმღები მთავარი ფიგურა სწორედ ივანიშვილია.

კობახიძის თქმით, ივანიშვილი „გარე მტრებისა და მათი ადგილობრივი აგენტების“ მთავარი სამიზნეა. პრემიერმა აღნიშნა, რომ ოპონენტების კრიტიკა, თითქოს ქვეყანას არა დემოკრატიული წესებით, არამედ ერთპიროვნულად ბიძინა ივანიშვილი მართავს, უსაფუძვლოა, თუმცა იქვე დასძინა, რომ მისი გავლენა გადაწყვეტილებებზე „საპატიო თავმჯდომარის როლს შეესაბამება“.

პრემიერ-მინისტრმა ბიძინა ივანიშვილი „პოლიტიკის დიდოსტატად“ და „გამორჩეული ინტელექტის მქონე პატრიოტად“ დაახასიათა. კობახიძის მტკიცებით, სწორედ ივანიშვილის ხელმძღვანელობით დაარსდა 2012 წლის შემდეგ „ადამიანის უფლებებზე დაფუძნებული დემოკრატიული მმართველობა“.

ბრიფინგზე კობახიძემ განაცხადა, რომ იგი ხშირად ეყრდნობა ივანიშვილის „ფასდაუდებელ რჩევებს“ და ამის უგულებელყოფა ქვეყნის ინტერესების საწინააღმდეგო ნაბიჯი იქნებოდა. მისი თქმით, მმართველ გუნდში დისკუსიების დროს, მიუხედავად განსხვავებული აზრების პატივისცემისა, ყველაზე ხშირად სწორედ ივანიშვილის პოზიცია იმარჯვებს, რაც მისი „გამორჩეული კომპეტენციით“ აიხსნება.

კობახიძემ ასევე ისაუბრა კორუფციასთან ბრძოლაზე და აღნიშნა, რომ 2023 წლის დეკემბერში ივანიშვილის პოლიტიკაში დაბრუნება სწორედ ამ გამოწვევას უკავშირდებოდა. მისი თქმით, „მმართველობის ზედა ეშელონებში კორუფცია სრულად არის აღმოფხვრილი“, რაც, როგორც ჩანს, ყოფილი მაღალჩინოსნების, მათ შორის ირაკლი ღარიბაშვილის წინააღმდეგ მიმდინარე პროცესებს გულისხმობს.

ოპოზიციური სპექტრის წარმომადგენლებმა კობახიძის ბრიფინგი მკაცრად გააკრიტიკეს. პარტია „ლელოს“ წევრმა თამაზ დათუნაშვილმა ამას „საზიზღარი სანახავი პირფერობა“ უწოდა, ხოლო „ფედერალისტების“ ლიდერმა გიგა ბოკერიამ ეს „პიროვნების კულტის ღია დეკლარაციად“ შეაფასა.

პოლიტიკურ წრეებში ვარაუდობენ, რომ ეს ბრიფინგი შესაძლოა ივანიშვილის მხრიდან არსებული უკმაყოფილების განეიტრალების მცდელობა იყოს. პარალელურად, ვრცელდება ინფორმაცია მმართველ გუნდში შესაძლო საკადრო ცვლილებების შესახებ, თუმცა „ქართული ოცნება“ ამ ცნობებს არ ადასტურებს.