საქართველოს პრემიერ-მინისტრმა ირაკლი კობახიძემ პატიმრების შეწყალებისა და მათთან საპროცესო შეთანხმებების გაფორმების საკითხზე მკაფიო პოზიცია დააფიქსირა. პრემიერის განცხადებით, ხელისუფლება მზადაა განიხილოს შეწყალების საკითხი, თუ მსჯავრდებულები დანაშაულს აღიარებენ და გულწრფელ სინანულს გამოხატავენ.

კობახიძემ აღნიშნა, რომ ეს პოლიტიკა უკვე ასახულია კონკრეტულ შედეგებზე. მისი თქმით, 4 ოქტომბრის საქმეზე დაკავებულმა პირებმა აღნიშნული წინადადება მიიღეს, რის შედეგადაც მათ დანაშაული აღიარეს და პროკურატურასთან საპროცესო შეთანხმება გააფორმეს.

„ჩვენ გავაკეთეთ ძალიან მკაფიო განცხადება შეწყალებასთან დაკავშირებით. თუ იქნება დანაშაულთან მიმართებით სინანული და შესაბამისი მიმართვა, მზად ვართ, გვქონდეს რეაგირება. მოვუწოდებ სხვა პატიმრებსაც, მიბაძონ ამ ადამიანებს და მიმართონ პრეზიდენტს შეწყალებისთვის“, - განაცხადა ირაკლი კობახიძემ.

3 ფოტო — დააჭირე გასადიდებლად

სამართლებრივი პრევენცია და წარსული გამოცდილება

პრემიერმა ხაზი გაუსვა, რომ აღნიშნული მიდგომა დანაშაულის პრევენციას ემსახურება. მან გაიხსენა 2023 წლის მოვლენები და აღნიშნა, რომ სახელმწიფო ინსტიტუტებზე თავდასხმების დროს განხორციელებულმა შეწყალებებმა სასურველი შედეგი ვერ გამოიღო.

„მაშინ ერთი პირი შეიწყალეს, შემდეგ ექვსი. ამან პრევენციული ეფექტი არ იქონია, პირიქით, წაახალისა ახალი ძალადობა. ახალი ძალადობის თავიდან ასაცილებლად აუცილებელია, სამართალი აღსრულდეს. ჩვენი პირობა ძალაში რჩება: აღიარებისა და სინანულის შემთხვევაში, ხელისუფლება შესაბამისად იმოქმედებს“, - განაცხადა მთავრობის მეთაურმა.

ირაკლი კობახიძის განცხადებით, პრეზიდენტთან შეთანხმებით, ხელისუფლება მზადაა, ინდივიდუალური მიმართვების საფუძველზე, კანონის ფარგლებში გადაწყვეტილებები მომავალშიც მიიღოს.