საქართველოს პრემიერ-მინისტრმა ირაკლი კობახიძემ სერბეთის რესპუბლიკის პრეზიდენტს, ალექსანდარ ვუჩიჩს, ოფიციალურ ვახშამზე უმასპინძლა. სერბეთის ლიდერი თბილისს მეუღლესთან და სამთავრობო დელეგაციასთან ერთად დღეს ეწვია.

მთავრობის მეთაურმა ხაზი გაუსვა ალექსანდარ ვუჩიჩის ვიზიტის განსაკუთრებულ მნიშვნელობას. ირაკლი კობახიძემ სერბეთის პრეზიდენტს საქართველოს მხარდაჭერისთვის მადლობა გადაუხადა.

ოფიციალური ნაწილის პარალელურად, სტუმრებმა თბილისის გაცნობის შესაძლებლობა მიიღეს. დელეგაციის წევრებმა ფუნიკულიორით იმგზავრეს და დედაქალაქის პანორამული ხედები დაათვალიერეს.

ვიზიტი ხაზს უსვამს ორ ქვეყანას შორის არსებულ დიპლომატიურ კავშირებს. მხარეები ოფიციალური შეხვედრების ფარგლებში თანამშრომლობის გაღრმავების პერსპექტივებზე მსჯელობენ.