ქუვეითის სამოქალაქო ავიაციის გენერალურმა სამსახურმა ოფიციალურად დაადასტურა, რომ ქვეყნის საჰაერო სივრცე სამოქალაქო ავიაციისთვის კვლავ გახსნილია. გადაწყვეტილება მას შემდეგ მიიღეს, რაც გამთენიისას რეგიონში განვითარებული მოვლენების გამო, უსაფრთხოების მიზნით, ფრენები დროებით შეჩერდა.

ქუვეითის საერთაშორისო აეროპორტი ამჟამად სრულად ფუნქციონირებს. უწყების ცნობით, ისინი სიტუაციას 24-საათიან რეჟიმში აკვირდებიან, რათა ფრენების უსაფრთხოება სრულად იყოს დაცული.

რა მოხდა რეგიონში?

საჰაერო სივრცის დროებითი დახურვა ირანის რევოლუციური გვარდიის კორპუსის ქმედებებს უკავშირდება. დაჯგუფების განცხადებით, ხუთშაბათს დილით მათ მიზანში ამოიღეს აშშ-ის საჰაერო ბაზები ქუვეითში, იორდანიასა და ბაჰრეინში.

CNN-ის ინფორმაციით, სწორედ ამ თავდასხმების სერიამ გამოიწვია ქუვეითის ხელისუფლების მხრიდან საჰაერო მიმოსვლის შეზღუდვა. ვითარების დეესკალაციის შემდეგ, ქვეყნის საავიაციო ხელისუფლებამ ოპერაციების განახლების გადაწყვეტილება მიიღო.

ამ დროისთვის აეროპორტში ვითარება სტაბილურია და რეისები დაგეგმილი გრაფიკის მიხედვით სრულდება.