ბრიტანელი პოლიტიკოსი ბიბლიოთეკებიდან „გენდერული იდეოლოგიის“ წიგნების ამოღებას გეგმავს

უორვიკშირის საგრაფოს საბჭოს ლიდერი, პარტია „რეფორმის“ წევრი ჯორჯ ფინჩი მორიგი კრიტიკის ქარცეცხლში მოექცა. მიზეზი მისი განცხადებაა, რომლის მიხედვითაც, საგრაფოს ბიბლიოთეკებიდან „სადავო გენდერული იდეოლოგიის“ შემცველი წიგნები უნდა ამოიღონ.

ფინჩის თქმით, ბიბლიოთეკები არ უნდა იქცეს პოლიტიკური იდეოლოგიების გამტარებელ სივრცეებად, რადგან მსგავსი თემები „მაღალი მუხტის მატარებელი და პოლარიზებულია“ და ისინი ბავშვებს „ჭეშმარიტებად“ არ უნდა ასწავლონ. მან აღნიშნა, რომ ახალი პოლიტიკა მას შემდეგ შემუშავდება, რაც ადგილობრივი მცხოვრებლებისგან არაერთი საჩივარი მიიღო.

აღნიშნულ განცხადებას „უორვიკშირის პრაიდის“ მხრიდან მყისიერი რეაქცია მოჰყვა. ორგანიზაციამ ფინჩის წინააღმდეგ ეთიკის კოდექსის დარღვევის შესახებ ოფიციალური საჩივარი შეიტანა. მათი განცხადებით, პოლიტიკოსის რიტორიკა ლგბტ+ თემის წარმომადგენლებს კიდევ უფრო მეტად მარგინალიზაციას უწევს.

„წიგნების ან რესურსების შეზღუდვა, რომლებიც ლგბტქ+ ადამიანების არსებობას აღიარებს, როგორც ნეიტრალიტეტის დარღვევა, არის შეცდომაში შემყვანი და სახიფათო პრაქტიკა,“ – აცხადებენ უფლებადამცველები. მათ ხაზგასმით აღნიშნეს, რომ ბიბლიოთეკები სწავლისა და აღმოჩენების ადგილი უნდა იყოს და არა პოლიტიკური ცენზურის იარაღი.

ჯორჯ ფინჩი ამტკიცებს, რომ მისი შეშფოთება არ უკავშირდება ზოგადად სექსუალობას, არამედ კონკრეტულად ტრანსგენდერულ საკითხებს. თუმცა, მან უარი თქვა იმ კონკრეტული წიგნების დასახელებაზე, რომლებიც მის შეშფოთებას იწვევს. ფინჩმა ასევე გაავრცელა პოზიცია, რომ „შავი ცხოვრება მნიშვნელოვანია“ (Black Lives Matter) მოძრაობის შესახებ წიგნებსაც არ უნდა ჰქონდეთ ცალკე სტენდები ბიბლიოთეკებში.

პოლიტიკოსის განცხადებით, ახალი „ყოვლისმომცველი პოლიტიკა“ ბიბლიოთეკების გარდა, საბჭოს დაქვემდებარებაში არსებულ ყველა საჯარო სივრცეზე გავრცელდება. მისი თქმით, ეს მშობლებს მისცემს „სიმშვიდეს“, რომ მათ შვილებს არ ახვევენ თავს კონკრეტულ პოლიტიკურ იდეებს.

შეგახსენებთ, რომ ეს ფინჩისთვის პირველი სკანდალი არ არის. ის უკვე იმყოფება გამოძიების ქვეშ სხვა საჩივრების გამო, მათ შორის ბავშვზე ძალადობის საქმესთან დაკავშირებით გაკეთებული საჯარო კომენტარების გამო, რამაც შესაძლოა სასამართლო პროცესი დააზიანოს. ოპოზიციური პარტიების წარმომადგენლები კი მას ცენზურის დაწესებასა და „ტრამპისტულ“ რიტორიკაში ადანაშაულებენ.