2011 წლის 26 მაისის მოვლენებიდან 15 წელი გავიდა. დამოუკიდებლობის დღის აღლუმის წინ, ხელისუფლებამ საპროტესტო აქცია ძალის გამოყენებით დაშალა, რასაც ასეულობით დაშავებული და 4 გარდაცვლილი მოჰყვა.

პარლამენტის ყოფილი წევრი დავით ლორთქიფანიძე იმ დღეს „სადამსჯელო ღონისძიებას“ უწოდებს. მისი თქმით, მაშინდელმა ხელისუფლებამ მომიტინგეებს გასასვლელიც კი არ დაუტოვა.

„სისხლის ნიაღვრები მოედინებოდა“

ლორთქიფანიძე იხსენებს, რომ რუსთაველის გამზირზე ვითარება უკიდურესად მძიმე იყო. „სისხლის ნიაღვრები მოდიოდა, პირდაპირი მნიშვნელობით“, — აცხადებს ის.

დაშავებულების ნაკადი იმდენად დიდი იყო, რომ სამედიცინო დაწესებულებები ვეღარ უმკლავდებოდნენ. „ღუდუშაურის კლინიკაში თავიდან იმდენი დაზიანებული ადამიანი მივიყვანეთ, რომ ადგილი აღარ იყო და მათ ბეტონის საფარზე აწვენდნენ“, — ჰყვება ლორთქიფანიძე.

მისივე თქმით, მხოლოდ ერთ ჯერზე ასზე მეტი დაშავებული გადაიყვანეს საავადმყოფოში. მათ შორის იყო სულიკო ასათიანი, რომლის ოჯახმაც მოგვიანებით „კურიერთან“ საუბარში დარბევის დეტალები გაიხსენა.

პოლიტიკური კრიტიკა

დავით ლორთქიფანიძე დღევანდელ პოლიტიკურ ვითარებასაც აფასებს. ის აცხადებს, რომ იმ მოვლენების შემოქმედები დღეს სხვა გუნდების სახელით ცდილობენ პოლიტიკაში დაბრუნებას.

„უტიფრად გვატყუებენ, რომ გამოსწორდნენ. გამახსენეთ ერთი ფაქტი, როდესაც მათ სინანული გამოთქვეს? მათ არც სინანული აქვთ და ჰგონიათ, რომ ქართველ ხალხს მახსოვრობა არ აქვს“, — აღნიშნავს ლორთქიფანიძე.

მისი თქმით, წარმოუდგენელია იმ ტრაგედიის დავიწყება, რომელიც ქვეყანამ 15 წლის წინ გამოიარა.