ვლადიმირ პუტინის სპეციალური წარმომადგენელი საერთაშორისო კულტურულ თანამშრომლობაში, მიხაილ შვიდკოი, თბილისში რობერტ სტურუას ახალი სპექტაკლის, „ვეფხისტყაოსნის“ სანახავად ჩამოვიდა. როგორც შვიდკოი რუსულ მედიაში გამოქვეყნებულ წერილში აღნიშნავს, სპექტაკლის ნახვის სურვილი იმდენად დიდი იყო, რომ მან თბილისში მოგზაურობა სწორედ ამ ღონისძიებას დაუკავშირა.

„ვეფხისტყაოსანი“ როგორც ეროვნული მსოფლმხედველობა

შვიდკოის განცხადებით, „ვეფხისტყაოსანი“ საქართველოსთვის გაცილებით მეტია, ვიდრე უბრალოდ XII-XIII საუკუნეების პოემა. მისი თქმით, ეს არის ეროვნული მსოფლმხედველობის საფუძველთა საფუძველი, რომელიც თითოეული ქართველის ცხოვრებას დაბადებიდან სიცოცხლის ბოლომდე გასდევს.

ამ ფაქტორმა განაპირობა ის მწვავე დისკუსიები, რომელიც რობერტ სტურუას დადგმამ როგორც თეატრალურ წრეებში, ისე ფართო საზოგადოებაში გამოიწვია. კრიტიკოსები და მაყურებლები მსჯელობენ, სად გადის რეჟისორის თავისუფლების საზღვრები, როდესაც ათსაათიანი ეპოსი 90-წუთიან სპექტაკლად გარდაიქმნება.

რეჟისორის ხედვა და კრიტიკული აზრი

შვიდკოი მიიჩნევს, რომ შოთა რუსთაველის სახელობის თეატრის ახალ ნამუშევარში არ არის ორიგინალი ტექსტისადმი „მონური ერთგულება“. თუმცა, მისივე შეფასებით, სპექტაკლი მაინც ახერხებს პოემის დიდებული ჰუმანისტური არსის სრულად გადმოცემას.

„სპექტაკლი გათვლილია იმ მაყურებელზე, რომელმაც უკვე იცის სამი რაინდის ხეტიალისა და გმირობის ბედნიერი დასასრული“, – წერს შვიდკოი.

წერილის დასასრულს, პუტინის წარმომადგენელი მაყურებელს მოუწოდებს, არ დაიჩივლონ იმაზე, რომ რაღაც დეტალები სპექტაკლში ბოლომდე ნათქვამი არ არის. მან ნიკოლოზ ბარათაშვილის ცნობილი სტრიქონებიც გაიხსენა: „მაშა დუმილიც მიმითვალე შენდამი ლოცვად!“

შეგახსენებთ, რომ ამ დადგმით საქართველოს ეროვნულმა თეატრმა თავისი 178-ე სეზონი დაასრულა.