რუსეთის პრეზიდენტის სპეციალური წარმომადგენელი საერთაშორისო კულტურულ თანამშრომლობაში, მიხეილ შვიდკოი, 14-15 ივნისს თბილისს ეწვია. ინფორმაციას რუსული სახელმწიფო სააგენტო TASS ავრცელებს.

ვიზიტის ფარგლებში შვიდკოიმ რამდენიმე კულტურულ ღონისძიებას დაესწრო, მათ შორის ფილმ-სპექტაკლების, „ცირკის პრინცესასა“ და „რევერსის“ ჩვენებებს. რუსი ოფიციალური პირის განცხადებით, კულტურა არის ის სფერო, რომელსაც შეუძლია ქვეყნებს შორის ნდობის ატმოსფეროს ეტაპობრივი აღდგენა.

კულტურა როგორც „ნდობის“ ინსტრუმენტი

შვიდკოის თქმით, რუსეთს სურს, საქართველოს მაქსიმალურად წარუდგინოს თანამედროვე რუსული ხელოვნება, კინო და მხატვრობა. მანვე აღნიშნა, რომ რუსული მხარე მხოლოდ იმ ღონისძიებებს განახორციელებს, რაც „ქართველი პარტნიორებისთვის კომფორტული იქნება“.

„ვფიქრობ, კულტურა ის სფეროა, რომელსაც შეუძლია, ნაბიჯ-ნაბიჯ, ყოველგვარი ძალდატანების გარეშე, აღადგინოს ის ნდობის ატმოსფერო, რომელიც ჩვენს ქვეყნებს შორის არსებობდა“, — აცხადებს შვიდკოი TASS-ის ციტირებით.

მან ასევე ხაზი გაუსვა, რომ რუსეთი ღიაა ქართველი არტისტებისთვის და აღნიშნა, რომ რუსეთში უკვე მრავალი ქართველი შემსრულებელი და მუსიკოსი ცხოვრობს და მოღვაწეობს.

კონტექსტი და პოლიტიკური შეფასებები

ეს მიხეილ შვიდკოის მეორე ვიზიტია საქართველოში ბოლო თვეების განმავლობაში. მარტში ის საქართველოს კათოლიკოს-პატრიარქის, ილია II-ის დაკრძალვის ცერემონიას დაესწრო.

ვიზიტი საქართველოში რუსეთთან დაკავშირებული კულტურული ღონისძიებების მიმართ გაზრდილი საზოგადოებრივი კრიტიკის ფონზე მიმდინარეობს. მაისში თბილისის რუსთაველის თეატრში გამართულმა კონცერტმა, სადაც რუსეთის თეატრალური ხელოვნების ინსტიტუტის (GITIS) სტუდენტებმა საბჭოთა სამხედრო სიმღერები შეასრულეს, საზოგადოების პროტესტი გამოიწვია.

საქართველოს პარლამენტის თავმჯდომარემ, შალვა პაპუაშვილმა, შვიდკოის ვიზიტთან დაკავშირებით განაცხადა, რომ მას არ აქვს ინფორმაცია ვიზიტის დეტალების შესახებ. თუმცა, მანვე აღნიშნა, რომ საქართველოს კანონმდებლობის დაცვით, ნებისმიერ მსურველს შეუძლია ქვეყანაში შემოსვლა.

რაც შეეხება ორმხრივ ურთიერთობებს, პაპუაშვილის პოზიცია უცვლელია: „კულტურული, ეკონომიკური და საგანმანათლებლო ურთიერთობები იქნება მას შემდეგ, რაც საქართველოს დეოკუპაცია მოხდება“.