2025 წელს საქართველოში ოჯახში ძალადობის ფაქტებზე სისხლისსამართლებრივი დევნა 4585 პირის მიმართ დაიწყო. მონაცემები გენერალურმა პროკურორმა გიორგი გვარამაძემ უწყების წლიური ანგარიშის წარდგენისას გააჟღერა.

პროკურატურის პოლიტიკა ძალადობრივ დანაშაულებთან დაკავშირებით გამკაცრებულია. უწყების ცნობით, შემთხვევების 91%-ში პროკურორები ბრალდებულებისთვის ყველაზე მკაცრი აღკვეთის ღონისძიების — პატიმრობის შეფარდებას მოითხოვდნენ.

სასამართლოების გადაწყვეტილებით, აღნიშნული შუამდგომლობები სრულად არ დაკმაყოფილებულა, თუმცა პატიმრობა ბრალდებულთა 62%-ს შეეფარდა. ეს მაჩვენებელი ბოლო ხუთი წლის განმავლობაში ყველაზე მაღალია, რაც მიუთითებს მართლმსაჯულების სისტემის მხრიდან ოჯახში ძალადობის საქმეების მიმართ გაზრდილ ყურადღებაზე.

სპეციალიზაცია და რეციდივის პრევენცია

უწყება აგრძელებს პროკურორების სპეციალიზაციას ოჯახში ძალადობის მიმართულებით. გასულ წელს სპეციალური გადამზადების კურსი 21-მა პროკურორმა გაიარა. მიზანი საქმეების უფრო ეფექტურად და კვალიფიციურად წარმართვაა.

ცვლილებები შეეხო მოწმეთა და დაზარალებულთა კოორდინატორების მუშაობასაც. მათ ჩართულობა პრიორიტეტული გახდა ისეთ მძიმე მუხლებზე, როგორიცაა მკვლელობა, თვითმკვლელობამდე მიყვანა და სქესობრივი თავისუფლებისა და ხელშეუხებლობის წინააღმდეგ მიმართული დანაშაულები.

პროკურატურამ ასევე დაასრულა 2018 წლის საქმეების სიღრმისეული კვლევა, მათ შორის განმეორებითი დანაშაულების ანალიზი. გენერალური პროკურორის თქმით, კვლევის მიზანი რეციდივის გამომწვევი ფაქტორების იდენტიფიცირებაა.

3 ფოტო — დააჭირე გასადიდებლად

ანალიზის საფუძველზე უწყება მომავალი სისხლისსამართლებრივი პოლიტიკის დახვეწას გეგმავს, რათა ოჯახში ძალადობის პრევენცია უფრო ქმედითი გახდეს.