„ოპოზიციის ალიანსი“, რომელიც არაერთ პოლიტიკურ პარტიას აერთიანებს, „ტვ პირველის“ მიერ გასაჯაროებულ კადრებს ეხმაურება. ვიდეომასალაში პოლიციელთა მხრიდან ახალგაზრდების მიმართ განხორციელებული ძალადობა ჩანს.

ალიანსის წევრები აცხადებენ, რომ ეს არ არის იზოლირებული შემთხვევა, არამედ სისტემური წამების პრაქტიკის ნაწილია. „დროას“ ლიდერმა გიგა ლემონჯავამ ბრიფინგზე აღნიშნა, რომ შინაგან საქმეთა სამინისტროს მტკიცება ეპიზოდური ძალადობის შესახებ რეალობას აცდენილია.

„სისტემა ჟონავს. ჩვენ ზუსტად ვიცით, რომ შსს-ს თანამშრომლები თავად იღებენ წამების ამსახველ ვიდეომასალას და შემდეგ მას სხვადასხვა ჩათში ავრცელებენ“, - განაცხადა ლემონჯავამ.

ოპოზიციური გაერთიანება მოუწოდებს მოქალაქეებს, თუ მსგავსი ძალადობის მტკიცებულებებს ფლობენ, ალიანსს მიაწოდონ. პოლიტიკოსების თქმით, ეს ნაბიჯი დაეხმარება სხვების დაცვას და პასუხისმგებლობის საკითხის დასმას.

პარტიების განცხადებით, კადრებში ასახული პერიოდისთვის აჭარის პოლიციის უფროსი გრიგოლ ბესელია იყო. ოპოზიცია ხაზს უსვამს, რომ სწორედ ბესელიას ჩვენების საფუძველზე იმყოფება პატიმრობაში ჟურნალისტი მზია ამაღლობელი.

ტელეკომპანია „პირველის“ მიერ გავრცელებულ 2-წუთიან ანონსში ჩანს, როგორ სცემენ პოლიციელები ახალგაზრდებს. გავრცელებული ინფორმაციით, ძალადობის მიზანი სასურველი ჩვენების მოპოვება იყო.

შინაგან საქმეთა სამინისტროს განმარტებით, აღნიშნული დანაშაული 2026 წლის თებერვალში გამოავლინა გენერალურმა ინსპექციამ. პროკურატურამ სამივე პოლიციელი 2026 წლის 23 თებერვალს დააკავა. საქმე ეხება 2022 წელს მომხდარ ფაქტს.

ადამიანის უფლებათა დამცველები აცხადებენ, რომ კითხვები მაინც რჩება. მთავარი კითხვა ისაა, თუ რატომ დასჭირდა სახელმწიფოს დანაშაულის გამოსავლენად თითქმის ოთხი წელი.

„ოპოზიციის ალიანსი“ თავდაპირველად 9 პარტიისგან შედგებოდა, მათ შორის „ნაციონალური მოძრაობა“, „ახალი“, „გირჩი - მეტი თავისუფლება“ და „დროა“. თუმცა, ბოლო პერიოდში განვითარებული მოვლენების ფონზე, ალიანსის შემადგენლობაში ცვლილებებია.