„ფალსიფიცირებული ფაქტები“: „ქართული ოცნება“ ევროპარლამენტის ანგარიშს პასუხობს

ევროპარლამენტის მიერ გამოქვეყნებულ ახალ ანგარიშს მმართველ პარტია „ქართულ ოცნებაში“ მწვავე კრიტიკით უპასუხეს. ხელისუფლების წარმომადგენლები დოკუმენტს „ფალსიფიცირებულს“ უწოდებენ და აცხადებენ, რომ ის რეალობასთან არავითარ კავშირში არ არის.

მედიის წინააღმდეგ მიმართული შეტევა

საპარლამენტო უმრავლესობის წევრი დავით მათიკაშვილი აცხადებს, რომ ანგარიშში გამოყენებული პასაჟები ეყრდნობა გადამოწმებულ ფაქტებს კი არა, არამედ სრულად გაყალბებულ ინფორმაციას. მისი თქმით, დოკუმენტის მიზანი ქართული მედიასაშუალებების წინააღმდეგ სანქციების დაწესება და მათი საქმიანობის შეზღუდვაა.

„ეს არის ევროპარლამენტის მხრიდან ჩვენს მიმართ არსებული დამოკიდებულების ტიპური გამოვლინება. ამ დოკუმენტს არავითარი ფასი არ გააჩნია, დაე, წერონ და იკითხონ რაც უნდათ“, — განაცხადა მათიკაშვილმა.

დეპუტატების შეფასებები

მმართველ გუნდში მიაჩნიათ, რომ ევროპარლამენტარების გარკვეული ნაწილი უცხოური ძალების ინტერესებს ატარებს და მათ „მარიონეტებად“ მოიხსენიებენ. ნინო წილოსანი კი ყურადღებას ამახვილებს იმაზე, რომ რეზოლუცია პირდაპირ ითხოვს სანქციებს ქართული ტელეკომპანიების — „იმედის“, „პოს ტვ“-სა და „რუსთავი 2“-ის წინააღმდეგ.

„ქვეყანაში არეულობის მოწყობისა და ომში ჩართვისთვის აუცილებელია საინფორმაციო სივრცის სრულად გაკონტროლება. სწორედ ამიტომ ვხედავთ შეტევას სიტყვის თავისუფლებაზე“, — აღნიშნა წილოსანმა.

საკითხს გამოეხმაურა დეპუტატი გიორგი გორდულაძეც, რომელმაც ევროპარლამენტარების მიმართ კრიტიკული პოზიცია დააფიქსირა და აღნიშნა, რომ სანამ ისინი ქართველი ხალხის წინაშე ბოდიშს არ მოიხდიან, მათ საქართველოს შესახებ საუბრის მორალური უფლება არ გააჩნიათ.