რუმინეთმა რუსეთის წინააღმდეგ მკაცრი დიპლომატიური ზომები გაატარა. ქვეყნის ხელისუფლებამ ქალაქ კონსტანცაში რუსეთის გენერალური კონსული პერსონა ნონ გრატად გამოაცხადა. ეს გადაწყვეტილება ეროვნული თავდაცვის უმაღლესი საბჭოს სხდომის შემდეგ გახდა ცნობილი.
რუსული დრონი რუმინულ კორპუსს დაეჯახა
ინციდენტი რუმინეთის სასაზღვრო ქალაქ გალაცში მოხდა. უკრაინის ოდესის ოლქზე რუსული მასირებული თავდასხმის დროს, ერთ-ერთი დრონი რუმინეთის საჰაერო სივრცეში შეიჭრა და 10-სართულიან საცხოვრებელ კორპუსს შეეჯახა. აფეთქების შედეგად კორპუსის ერთ-ერთ ბინაში ხანძარი გაჩნდა, დაშავდა ორი ადამიანი.
ეს შემთხვევა უპრეცედენტოა, რადგან პირველად დაფიქსირდა რუსული დრონის მიერ რუმინეთის მჭიდროდ დასახლებულ ტერიტორიაზე მიყენებული პირდაპირი ზიანი. ბუქარესტმა მომხდარი ოფიციალურად დაადასტურა და მას რუსეთის მხრიდან „სერიოზული და უპასუხისმგებლო ესკალაცია“ უწოდა.
დიპლომატიური და სამხედრო რეაქცია
დიპლომატიური დემარშის პარალელურად, მედიასაშუალებები ავრცელებენ ინფორმაციას, რომ შესაძლოა რუსეთის საკონსულო სრულად დაიხუროს. რუმინეთის საგარეო საქმეთა სამინისტრომ უკვე მიაწოდა დეტალური ინფორმაცია ნატო-ს გენერალურ მდივანს.
ბუქარესტი მოკავშირეებისგან დახმარებას ითხოვს. კერძოდ, მოთხოვნა შეეხება ანტიდრონული სისტემების გადაცემის დაჩქარებას, რათა მსგავსი ინციდენტები მომავალში აღიკვეთოს. რუმინეთისთვის უკრაინის საზღვართან არსებული ვითარება კრიტიკულად მნიშვნელოვანია, რადგან საჰაერო სივრცის დარღვევა პირდაპირ საფრთხეს უქმნის ნატო-ს წევრი ქვეყნის უსაფრთხოებას.
დისკუსია
0 კომენტარი
ჯერ კომენტარი არ არის — იყავი პირველი.