რუსეთის საოკუპაციო ძალებმა უკრაინის ტერიტორიაზე მორიგი მასირებული საჰაერო შეტევა განახორციელეს. 17-დან 18 ივნისის ღამით, დარტყმების მთავარი სამიზნე კიევისა და პოლტავის ოლქები გახდა.

კიევის ოლქის სამხედრო ადმინისტრაციის ცნობით, ბორისპოლისა და ვიშგოროდის რაიონებში დაზიანდა საცხოვრებელი სახლები, საგანმანათლებლო დაწესებულება, ანგარი და საწარმოო ობიექტი. ოფიციალური მონაცემებით, თავდასხმას მსხვერპლი არ მოჰყოლია.

პოლტავის ოლქში დარტყმებმა ენერგოობიექტი, საწყობები და საცხოვრებელი სახლები დააზიანა. მირნოგრადისა და პოლტავის რაიონებში დაშავდა ერთი მშვიდობიანი მოქალაქე. ადგილობრივი ადმინისტრაცია კონკრეტული საწარმოების დასახელებისგან თავს იკავებს.

დნიპროში, კერძო საწარმოზე განხორციელებულ დარტყმას ოთხი ადამიანი ემსხვერპლა. სუმის ოლქში კი დრონით შეტევის შედეგად ერთი მშვიდობიანი მოქალაქე დაიღუპა და დაზიანდა სახლი.

უკრაინის საჰაერო ძალების ოფიციალური ინფორმაციით, რუსეთმა ჯამში 7 ბალისტიკური რაკეტა და 239 უპილოტო საფრენი აპარატი გამოიყენა. დილის 08:00 საათისთვის დადასტურდა 4 რაკეტისა და 212 დრონის ჩამოგდება, ხოლო ცხრა ლოკაციაზე პირდაპირი დარტყმა დაფიქსირდა.

რუსეთის თავდაცვის სამინისტრომ საკუთარი ქმედება „კიევის რეჟიმის ტერორისტული შეტევების პასუხად“ მონათლა და განაცხადა, რომ მიზანში ამოიღეს ზატურინოს ნავთობგადამამუშავებელი ქარხანა და საწვავის საწყობი.

აღსანიშნავია, რომ იმავე დღეს უკრაინის თავდაცვის ძალებმა საპასუხო იერიში მიიტანეს მოსკოვის ნავთობგადამამუშავებელ ქარხანასა და როსტოვის ოლქში მდებარე ნავთობის საცავზე. კიევი რუსეთის სამხედრო ინფრასტრუქტურას ომის კანონიერ სამიზნედ მიიჩნევს.