დიდი ფეხბურთი საქართველოში იწყება. 2026 წლის მსოფლიო ჩემპიონატის დაწყებამდე სულ რამდენიმე საათი რჩება და „რუსთავი 2“ მაყურებელს პლანეტის ყველაზე მასშტაბურ საფეხბურთო სანახაობას პირდაპირ ეთერში შესთავაზებს.

წელს ტურნირი განსაკუთრებულია, რადგან მას სამი ქვეყანა მასპინძლობს, მატჩები კი 16 სხვადასხვა სტადიონზე გაიმართება. მათ შორისაა ლეგენდარული მექსიკური „აცტეკა“, სადაც ამ წუთებშიც დასკვნითი სამზადისი მიმდინარეობს.

ისტორიული მაუწყებლობა რუსთავი 2-ზე

ტელეარხის ისტორიაში პირველად, „რუსთავი 2“ ტურნირის ყველა, 104-ვე მატჩს ექსკლუზიურად აჩვენებს. მაუწყებლობა დღეიდან დაიწყება და 19 ივლისის ჩათვლით გაგრძელდება. არხმა სატელევიზიო ბადე სრულად შეცვალა, რათა გულშემატკივრებს ფეხბურთთან დაკავშირებული მაქსიმალური კონტენტი მიაწოდოს.

პირდაპირი ტრანსლაციების გარდა, მაყურებელი იხილავს საფეხბურთო მიმოხილვებსა და საინტერესო სიუჟეტებს. ტურნირის გაშუქებაში ჩართული იქნება 8 კომენტატორი, რომლებიც ერთმანეთს ეტაპობრივად შეცვლიან.

ახალი თაობის პასუხისმგებლობა

ტურნირის გაშუქებაზე საუბრობს „რუსთავი 2-ის“ კომენტატორი თორნიკე ბასიაშვილი. მისი თქმით, 48-გუნდიანი ჩემპიონატის წაყვანა დიდი გამოწვევა და საპასუხისმგებლო საქმეა.

„საოცარი გრძნობაა. პირადად ჩემთვის ეს იყო ყველაზე მოულოდნელი რამ, რადგან 23 წლის ასაკში მართლაც ძალიან დიდი პასუხისმგებლობაა 48-გუნდიანი მსოფლიო ჩემპიონატის წაყვანა. გაზრდილი გუნდების რაოდენობა გაცილებით მეტი სენსაციის მოლოდინს აჩენს“, — აცხადებს თორნიკე ბასიაშვილი.

კომენტატორი ასევე აღნიშნავს, რომ გულშემატკივრები განსაკუთრებული ინტერესით ელიან მესისა და რონალდოს შესაძლო დაპირისპირებას, რაც ამ ჩემპიონატს კიდევ უფრო მეტ დაძაბულობას სძენს.

გახსნის გრანდიოზული ცერემონია თბილისის დროით 22:20 საათზე დაიწყება. „რუსთავი 2“ მზად არის, მაყურებელს საფეხბურთო სამყაროს მთავარი მოვლენა სრულფასოვნად მიაწოდოს.