რუსთავში, ერთ-ერთი რესტორნის მიმდებარედ მომხდარი კონფლიქტი ტრაგედიით დასრულდა. შინაგან საქმეთა სამინისტროს ინფორმაციით, ინციდენტის შედეგად საშუალო ასაკის მამაკაცი გარდაიცვალა.

შემთხვევა ოთხშაბათიდან ხუთშაბათის ღამით მოხდა. გამოძიების პირველადი მონაცემებით, რესტორნის შიგნით დაწყებული კონფლიქტი მოგვიანებით გარეთ, ქუჩაში გაგრძელდა. ფიზიკური დაპირისპირების დროს დაზარალებული წაიქცა და თავის არეში მძიმე დაზიანება მიიღო, რამაც მისი გარდაცვალება გამოიწვია.

სამართალდამცველებმა შემთხვევის ადგილზევე დააკავეს პირი, რომელსაც გარდაცვლილზე ძალადობაში ედება ბრალი. მოგვიანებით, პოლიციამ ოპერატიული ღონისძიებების შედეგად კიდევ ოთხი პირი აიყვანა. გამოძიების ვერსიით, დაკავებულებმა ფიზიკური შეურაცხყოფა მიაყენეს გარდაცვლილის მეგობრებს.

მედიაში გავრცელებული ინფორმაციით, კონფლიქტი რესტორანში მყოფ სტუმრებს შორის დაიწყო, რომლებიც ერთმანეთის გვერდით მაგიდებთან ისხდნენ. ცნობილია, რომ გარდაცვლილი დაწესებულებაში მეუღლესთან და არასრულწლოვან შვილებთან ერთად იმყოფებოდა.

შინაგან საქმეთა სამინისტრომ გამოძიება საქართველოს სისხლის სამართლის კოდექსის ორი მუხლით დაიწყო:

  • 117-ე მუხლი — ჯანმრთელობის განზრახ მძიმე დაზიანება, რამაც ადამიანის სიცოცხლის მოსპობა გამოიწვია.
  • 126-ე მუხლი — ძალადობა.
3 ფოტო — დააჭირე გასადიდებლად

დანაშაული სასჯელის სახით რვა წლამდე ვადით თავისუფლების აღკვეთას ითვალისწინებს. ამ დროისთვის საქმეზე საგამოძიებო მოქმედებები გრძელდება.