აშშ-ში, ოჰაიოს შტატის ქალაქ ტოლედოში, ტრადიციული ფესტივალის მიმდინარეობისას სროლა მოხდა. დანაშაულებრივი ქმედების შედეგად, ოფიციალური მონაცემებით, 12 ადამიანი დაშავდა.

ინციდენტი Old West End Festival-ზე მოხდა, რომელიც ადგილობრივ მოსახლეობაში დიდი პოპულარობით სარგებლობს. ადგილზე მისულმა სამართალდამცველებმა დაშავებულები აღმოაჩინეს, რომელთა ნაწილიც სასწრაფო დახმარების ბრიგადებმა უახლოეს სამედიცინო დაწესებულებებში გადაიყვანეს.

ტოლედოს პოლიციის დეპარტამენტის განცხადებით, დაშავებულთაგან 10 ადამიანის მდგომარეობა ამ დროისთვის სტაბილურია. თუმცა, ორი დაზარალებული კრიტიკულ მდგომარეობაში რჩება და ექიმები მათ სიცოცხლის გადასარჩენად იბრძვიან.

3 ფოტო — დააჭირე გასადიდებლად

სამართალდამცველები ამ დრომდე აგრძელებენ საგამოძიებო მოქმედებებს. პოლიცია აქტიურად ეძებს ინციდენტში მონაწილე ეჭვმიტანილს ან ეჭვმიტანილებს. მომხდარის მოტივი ჯერჯერობით უცნობია, თუმცა გამოძიება ყველა შესაძლო ვერსიაზე მუშაობს.

ქალაქის ხელმძღვანელობა და სამართალდამცავი ორგანოები მოუწოდებენ მოქალაქეებს, ჰქონდეთ კავშირი პოლიციასთან, თუ მათ გააჩნიათ რაიმე ინფორმაცია, რომელიც დაეხმარება გამოძიებას დამნაშავეთა დადგენასა და დაკავებაში.