საქართველოს მთავრობა ყირგიზეთის დედაქალაქ ბიშკეკთან პირდაპირი საჰაერო მიმოსვლის დამყარებას გეგმავს. საკითხზე მოლაპარაკებები ეკონომიკისა და მდგრადი განვითარების სამინისტრომ უკვე დაიწყო.

2 ფოტო — დააჭირე გასადიდებლად

ეკონომიკის მინისტრის მოადგილის, მარიამ ქვრივიშვილის განცხადებით, პირდაპირი ფრენების დანიშვნა ორ ქვეყანას შორის ეკონომიკური თანამშრომლობის გაძლიერებისა და ტურიზმის განვითარებისთვის გადამწყვეტი ნაბიჯი იქნება.

„ვიზიტის ფარგლებში განსაკუთრებული ყურადღება დაეთმო ქვეყნებს შორის პირდაპირი საჰაერო მიმოსვლის საკითხს. ეს მნიშვნელოვანი წინ გადადგმული ნაბიჯი იქნება როგორც ეკონომიკური კავშირების გაღრმავებისთვის, ისე ხალხთაშორისი ურთიერთობების გასამყარებლად“, — განაცხადა ქვრივიშვილმა.

საქართველო და ყირგიზეთი აქტიურად მუშაობენ სატრანსპორტო დერეფნების გამართულობაზე. პირდაპირი რეისების ამოქმედება ხელს შეუწყობს ბიზნეს კონტაქტების გააქტიურებას და რეგიონებს შორის ლოჯისტიკური ჯაჭვის გამარტივებას.

მიუხედავად იმისა, რომ მხარეებს შორის მოლაპარაკებები უკვე მიმდინარეობს, ფრენების სიხშირისა და ავიაკომპანიების შესახებ დეტალები მოგვიანებით გახდება ცნობილი.