ცენტრალური საარჩევნო კომისია (ცესკო) სახელმწიფო აუდიტის სამსახურის მიერ მომზადებულ დასკვნას ეხმაურება, რომელიც 2023-2024 წლების საფინანსო-ეკონომიკურ საქმიანობას შეეხება. უწყების განმარტებით, აუდიტის შედეგები საჯაროდ 8 ივნისს გამოქვეყნდა, რასაც პარლამენტის საფინანსო-საბიუჯეტო კომიტეტში მოსმენაც მოჰყვა.

საარჩევნო ადმინისტრაციაში აცხადებენ, რომ აუდიტის სამსახურის რეკომენდაციები მათთვის სამუშაო პროცესის დახვეწის მნიშვნელოვანი ინსტრუმენტია. უწყების მტკიცებით, გამოქვეყნებულ დოკუმენტში საუბარი არ არის რაიმე ტიპის არსებით გადაცდომაზე.

ცესკოს ინფორმაციით, აუდიტის მიერ გაცემული 7 რეკომენდაციიდან 6 უკვე სრულად არის შესრულებული, ხოლო 1 რეკომენდაცია შესრულების პროცესშია. ყველა იმ საკითხზე, რომელიც აუდიტმა წამოჭრა, ადმინისტრაციას შესაბამისი ახსნა-განმარტება წარდგენილი აქვს.

3 ფოტო — დააჭირე გასადიდებლად

მიუხედავად ამისა, ცესკო აღნიშნავს, რომ გარკვეული დაინტერესებული მხარეები დასკვნას საკუთარი მიზნებისთვის იყენებენ. უწყების განცხადებით, ხდება მანიპულაციური განცხადებების ტირაჟირება, რაც საარჩევნო ადმინისტრაციის დისკრედიტაციას ემსახურება.

„მანიპულაციური და დისკრედიტაციული განცხადებების ავტორებს საკმარისი იყო წაეკითხათ აუდიტის რეკომენდაციების შესრულების ანგარიში, რომელიც საჯაროდ იქნა განხილული პარლამენტში. მათ ინტერესში არა სიმართლის გარკვევა, არამედ ადმინისტრაციის დაზიანებაა“, — ნათქვამია ოფიციალურ განცხადებაში.

საარჩევნო ადმინისტრაცია პირობას დებს, რომ ამომრჩეველს მხოლოდ გადამოწმებულ ინფორმაციას მიაწვდის და უპასუხოდ არ დატოვებს არცერთ მცდელობას, რომელიც საზოგადოებაში მცდარი აღქმების შექმნას ისახავს მიზნად.