რუსეთის სრულმასშტაბიანი შეჭრის დაწყებიდან დღემდე, უკრაინაში ომს, ოფიციალური მონაცემებით, სულ მცირე 707 ბავშვი ემსხვერპლა. ტრაგიკული სტატისტიკის შესახებ ინფორმაცია უკრაინის პრეზიდენტმა, ვოლოდიმირ ზელენსკიმ აგრესიის შედეგად დაზარალებულ ბავშვთა საერთაშორისო დღეს გაავრცელა.

„თითოეული მათგანი წართმეული სიცოცხლე და მომავალია. რუსეთმა ამ დანაშაულებისთვის პასუხი უნდა აგოს“, — განაცხადა ზელენსკიმ.

უკრაინის საგარეო საქმეთა სამინისტროს მონაცემები კიდევ უფრო მძიმე რეალობას აჩვენებს. ომის დაწყების დღიდან დაშავებულ არასრულწლოვანთა რაოდენობა 2 548-ს აღწევს, ხოლო 2 317 ბავშვი დღემდე დაკარგულად მიიჩნევა.

3 ფოტო — დააჭირე გასადიდებლად

უწყების ცნობით, ოკუპანტების მიერ განხორციელებული უკანონო დეპორტაციისა და იძულებით გადაყვანის მასშტაბი კრიტიკულია. რუსეთის ტერიტორიაზე 20 000-ზე მეტი უკრაინელი ბავშვია გადაყვანილი, რომელთაგან სამშობლოში დაბრუნება ამ დროისთვის მხოლოდ 2 212-მა შეძლო.

საგარეო უწყებაში ხაზგასმით აღნიშნავენ, რომ ეს რიცხვები მხოლოდ მშრალი სტატისტიკა არ არის. თითოეული მონაცემის უკან კონკრეტული ბავშვის ბედი, დანგრეული ოჯახები და ომის მძიმე ჰუმანიტარული შედეგები დგას.

საერთაშორისო საზოგადოება და უფლებადამცველი ორგანიზაციები ამ ფაქტებს მუდმივად აკვირდებიან, რადგან არასრულწლოვანთა მიმართ ჩადენილი დანაშაულები ომის ყველაზე მძიმე ეპიზოდებს წარმოადგენს.

უკრაინის ხელისუფლება აგრძელებს საერთაშორისო პარტნიორებთან მუშაობას, რათა დეპორტირებული ბავშვების დაბრუნება და ომის დამნაშავეების პასუხისმგებლობაში მიცემა უზრუნველყოფილი იყოს.