ევროკავშირის მუდმივ წარმომადგენელთა კომიტეტმა უკრაინისა და მოლდოვის გაწევრიანების საკითხზე მნიშვნელოვანი ნაბიჯი გადადგა. ელჩებმა საგანგებო წესით დღის წესრიგში შეიტანეს მოლაპარაკებების პირველი კლასტერის გახსნის საკითხი, რაც კანდიდატი ქვეყნების ევროინტეგრაციის პროცესში გარდამტეხი მომენტია.

არსებული ინფორმაციით, გადაწყვეტილება უკრაინასა და უნგრეთს შორის გამართული ტექნიკური მოლაპარაკებების შედეგად გახდა შესაძლებელი. უნგრულმა მხარემ ევროკავშირის საბჭოს აცნობა, რომ კონსულტაციებმა პოზიტიური შედეგი გამოიღო, რამაც ბლოკს საშუალება მისცა, პროცედურა დაეჩქარებინა.

3 ფოტო — დააჭირე გასადიდებლად

პირველი კლასტერის ფარგლებში ევროკავშირის ელჩები შეაფასებენ, რამდენად შეესაბამება უკრაინისა და მოლდოვის ეროვნული კანონმდებლობა და სტანდარტები ევროპულ მოთხოვნებს. ეს ეტაპი მოიცავს ფუნდამენტურ რეფორმებს, რომლებიც აუცილებელია გაწევრიანების შემდგომი ეტაპების გასავლელად.

პროცესი მოითხოვს კანდიდატი ქვეყნების მხრიდან სამართლებრივი სისტემის სრულ ჰარმონიზაციას ევროკავშირის ნორმატიულ ბაზასთან. დიპლომატიური წყაროების თანახმად, მხარეები აქტიურად აგრძელებენ მუშაობას, რათა ტექნიკური დეტალები შეთანხმებული დარჩეს.