„კოალიცია ცვლილებისთვის“ ერთ-ერთი ლიდერი, ზურაბ გირჩი ჯაფარიძე კატეგორიულად უარყოფს გავრცელებულ მოსაზრებას, თითქოს მისი გუნდი საარჩევნო კამპანიისას ამომრჩეველს არწმუნებდა, რომ „4-იანი“ და „5-იანი“ ერთი და იგივე პოლიტიკური ძალა იყო. ჯაფარიძის თქმით, მსგავსი საუბრები რეალობას მოკლებულია და „სასაცილოს მიღმაა“.

პოლიტიკოსი აღნიშნავს, რომ კოალიციის სტრატეგია პირიქით, „5 ნომერთან“ ეფექტურ გამიჯვნას ითვალისწინებდა. მან ხაზგასმით აღნიშნა, რომ კოალიციის შიდა კვლევები აჩვენებდა, რომ მათი მხარდამჭერების მნიშვნელოვანი ნაწილი არც „ქართული ოცნების“ და არც „ნაციონალური მოძრაობის“ მომხრე არ იყო.

„ამომრჩევლისთვის იმის თქმა, რომ ჩვენ და 5 ნომერი ერთი ვართ, ნიშნავდა სეპუკუს გაკეთებას“, - წერს ჯაფარიძე სოციალურ ქსელში. მან ჩამოთვალა რამდენიმე არგუმენტი, მათ შორის ის ფაქტი, რომ კოალიციის ლიდერების შეხვედრებზე მსგავსი სტრატეგია არასდროს განხილულა.

ჯაფარიძემ ასევე გაიხსენა რეგიონული შეხვედრები, სადაც, მისი თქმით, არცერთ საჯარო გამოსვლაში არ ყოფილა მინიშნება კოალიციის „5 ნომერთან“ კავშირზე. პოლიტიკოსი აღიარებს, რომ პარტიებს შორის არსებობდა გარკვეული დაპირისპირება, რაც ადგილობრივ დონეზე ხშირად მწვავედ ვლინდებოდა, თუმცა ეს კოალიციის გააზრებული სტრატეგიის ნაწილი არ ყოფილა.

3 ფოტო — დააჭირე გასადიდებლად

ერთადერთი გამონაკლისი, როგორც ჯაფარიძე განმარტავს, საზღვარგარეთ მყოფი ემიგრანტების დახმარება იყო. მისი თქმით, ეს პროცესი საერთო მიზანს ემსახურებოდა, როგორიცაა საკონსულო აღრიცხვაზე დადგომა ან დამატებითი საარჩევნო უბნების გახსნის მოთხოვნა, სადაც კოალიცია თანამშრომლობდა როგორც „ენმ-ს“, ისე „ლელოსა“ და „გახარიას“ მხარდამჭერებთან.

დასასრულს, ზურაბ ჯაფარიძე აღნიშნავს, რომ მიუხედავად იმისა, რომ ერთიანი სია და კონკურენციის არარსებობა შესაძლოა უფრო ეფექტური ყოფილიყო, ამის მიღწევა პოლიტიკურმა ძალებმა ვერ შეძლეს.