ბრიტანეთის ვიცე-პრემიერმა დევიდ ლემიმ საჯაროდ დაადასტურა, რომ აშშ-ის ვიცე-პრეზიდენტ ჯეი დი ვენსს პირადად დაუკავშირდა. საუბრის მიზეზი ვენსის მიერ სოციალურ ქსელ X-ზე გამოქვეყნებული პოსტი გახდა, სადაც მან 18 წლის სტუდენტის, ჰენრი ნოვაკის მკვლელობა „მასობრივ მიგრაციას“ დაუკავშირა.

რა მოხდა საუთჰემპტონში?

ჰენრი ნოვაკი გასული წლის დეკემბერში საუთჰემპტონში სასიკვდილოდ დაჭრეს. მკვლელი, ვიკრუმ დიგვა, დიდი ბრიტანეთის მოქალაქეა, რომელიც ქვეყანაში დაიბადა. მან სასამართლოზე ცრუ ჩვენება მისცა და ამტკიცებდა, რომ თავს იცავდა და რასობრივი შეურაცხყოფის მსხვერპლი გახდა, თუმცა გამოძიებამ ეს ვერსია არ დაადასტურა.

დიგვა სამუდამო პატიმრობით დაისაჯა. მკვლელობამ დიდი საზოგადოებრივი მითქმა-მოთქმა გამოიწვია ბრიტანეთში, რაც დანით ჩადენილ დანაშაულებსა და პოლიციის მუშაობის ეფექტიანობას უკავშირდებოდა.

ვენსის პოზიცია და ლემის პასუხი

ჯეი დი ვენსმა ნოვაკის გარდაცვალება „ცივილიზაციის კვდომას“ შეადარა. მისი თქმით, ახალგაზრდა რომ „ევროპელი ელიტების მიერ მასობრივი მიგრაციისადმი დათმობების“ გამო დაიღუპა. ვენსმა მომხდარს „ტრაგედია და გამაოგნებელი ფაქტი“ უწოდა.

დევიდ ლემიმ სატელევიზიო ინტერვიუში განაცხადა, რომ ვენსთან საუბრისას ხაზგასმით აღნიშნა: „ამ მკვლელობას მასობრივ მიგრაციასთან არანაირი კავშირი არ აქვს“. ლემის თქმით, საუბარი იყო „მკაცრი, მაგრამ საქმიანი“.

„მე მას ვუთხარი, რომ ის ცდებოდა. ჩვენ განსხვავებული შეხედულებები გვაქვს დასავლური ცივილიზაციის მდგომარეობაზე, თუმცა კვლავ ვრჩებით კოლეგებად და მეგობრებად“, - განაცხადა ლემიმ.

ბრიტანეთის ვიცე-პრემიერმა ასევე შეახსენა ვენსს, რომ თავად ნოვაკის ოჯახი საზოგადოებას სიმშვიდისკენ მოუწოდებდა. გარდაცვლილის მამამ, მარკ ნოვაკმა, სასამართლო პროცესის შემდეგ განაცხადა, რომ არ სურს შვილის სიკვდილი სიძულვილისა და დაძაბულობის გასაღვივებლად გამოიყენონ.

პოლიტიკური ფონი

ლემისა და ვენსს შორის მრავალწლიანი მეგობრობა აკავშირებთ. მათი ურთიერთობა ჯერ კიდევ მაშინ დაიწყო, როდესაც ლემი ოპოზიციაში იყო, ხოლო ვენსი აშშ-ის სენატში ახალი არჩეული. შარშან ვენსი ოჯახთან ერთად ბრიტანეთში ვიზიტისას ლემის რეზიდენციაშიც სტუმრობდა.

მიუხედავად პირადი მეგობრობისა, აშშ-სა და ბრიტანეთის ურთიერთობებში ბოლო პერიოდში გარკვეული დაძაბულობა შეინიშნება. ეს განსაკუთრებით ირანში მიმდინარე მოვლენებსა და ბრიტანეთის გადაწყვეტილებას უკავშირდება, არ მიეღო მონაწილეობა ტრამპის ადმინისტრაციის მიერ დაგეგმილ სამხედრო ოპერაციებში.