სომხეთში საპარლამენტო არჩევნები დაძაბულ ვითარებაში მიმდინარეობს. ცენტრალური საარჩევნო კომისიის ოფიციალური მონაცემებით, დილის 11:00 საათისთვის კენჭისყრაში მონაწილეობა უკვე 362 657-მა მოქალაქემ მიიღო, რაც ამომრჩეველთა საერთო რაოდენობის 14,48%-ს შეადგენს.

დაკავებები და ოპოზიციის რეაქცია

არჩევნების დღეს ქვეყანაში საპოლიციო აქტივობა მაღალია. ოპოზიციური პარტია „ძლიერი სომხეთის“ ლიდერი, სამველ კარაპეტიანი აცხადებს, რომ ხელისუფლების მხრიდან მათი მხარდამჭერების დაკავებები სისტემურ ხასიათს ატარებს. მისი თქმით, მიუხედავად წნეხისა, ოპოზიცია ბრძოლისუნარიანობას ინარჩუნებს.

„ახლაც გრძელდება ჩვენი მომხრეების დაკავება. ძალიან ბევრი უკვე დააკავეს, მაგრამ ეს ჩვენ არ შეგვაშინებს. დღეს ჩანს, რომ ყველა საბრძოლო განწყობითაა და მნიშვნელოვანია ლეგიტიმური ხელისუფლების არჩევა“, - აცხადებს სამველ კარაპეტიანი.

ოპოზიციონერი პოლიტიკოსი ხაზს უსვამს, რომ ქვეყნის სამომავლო საგარეო პოლიტიკა დაბალანსებული უნდა იყოს. მისი განცხადებით, სომხეთს სჭირდება მჭიდრო და ჯანსაღი ურთიერთობა როგორც დასავლეთთან, ისე რუსეთთან.

სამართალდამცავების ქმედებები

სომხეთის საგამოძიებო კომიტეტის ინფორმაციით, დაკავებების სერია უკავშირდება სხვადასხვა სისხლის სამართლის საქმეს. მათ შორის არის ერევნის ყოფილი მერი გაგიკ ბეგლარიანი, რომელსაც უფლებამოსილების ბოროტად გამოყენებასა და ფულის გათეთრებას ედავებიან.

არჩევნებამდე ერთი დღით ადრე, სამართალდამცავებმა „ძლიერი სომხეთის“ დეპუტატობის ექვსი კანდიდატი დააკავეს. ჩხრეკა ჩატარდა პარტიის შტაბ-ბინაში, ასევე ადამიანის უფლებათა დამცველ კარაპეტ პოღოსიანის საცხოვრებელში. არსებული მონაცემებით, სულ ქვეყნის მასშტაბით ოპოზიციურ პარტიებთან დაკავშირებული 100-მდე პირია დაკავებული.

არჩევნების მონაწილეები

საპარლამენტო არჩევნებში მონაწილეობას იღებენ როგორც მოქმედი პრემიერ-მინისტრი ნიკოლ ფაშინიანი და მისი გუნდი, ისე ოპოზიციური გაერთიანებები. მათ შორის არიან:

  • „სომხეთის ალიანსი“, რომელსაც ექსპრეზიდენტი რობერტ ქოჩარიანი ლიდერობს.
  • გაგიკ წარუკიანის პარტია „სომხეთის კეთილდღეობა“.
  • „ძლიერი სომხეთი“, რომლის კანდიდატი სამველ კარაპეტიანი ამჟამად შინაპატიმრობაში იმყოფება.