ფინიქს სანსის ლიდერი დევინ ბუკერი კარიერაში მნიშვნელოვან ცვლილებას გეგმავს. ESPN-ის ცნობით, კალათბურთელი, რომელიც 2015 წლიდან დღემდე მოედანზე ნომერ 1-ით გამოდიოდა, ახალი სეზონიდან 15-ნომრიან მაისურს მოირგებს.

ეს გადაწყვეტილება ემოციურ და სიმბოლურ დატვირთვას ატარებს. ნომერი 15 პირდაპირ კავშირშია ბუკერის მამასთან, მელვინ ბუკერთან, რომელმაც კოლეჯის კარიერა სწორედ ამ ნომრით გაატარა. გარდა ამისა, დევინმა ეს ნომერი წარმატებით გამოიყენა აშშ-ის ნაკრების შემადგენლობაში, სადაც ტოკიოსა და პარიზის ოლიმპიადებზე ოქროს მედლები მოიპოვა.

აღსანიშნავია, რომ ბუკერი თავისი სპორტული გზის დასაწყისში სხვადასხვა ნომერს იყენებდა. მისმა მამამ, მელვინმა, რომელიც ასევე პროფესიონალი კალათბურთელი იყო, თავისი კვალი მისურიში სწორედ 15-ნომრიანი მაისურით დატოვა. თავად დევინმა სკოლის პერიოდში ნომერი 2 აირჩია, თუმცა NBA-ში მოხვედრის შემდეგ 1-იანზე შეაჩერა არჩევანი.

ფინიქს სანსის ისტორიაში ბუკერი მე-16 კალათბურთელი იქნება, ვინც 15-ნომრიან მაისურს მოირგებს. ამ ნომრით სანსში ყველაზე დასამახსოვრებელი გამოსვლა დენი მენინგს ჰქონდა, რომელმაც 1998 წელს „მეექვსე კაცის“ ჯილდო მოიპოვა.

გასული სეზონი ფინიქსისთვის რთული გამოდგა. გუნდი პლეი-ოფის პირველივე რაუნდში ოკლაჰომა სიტი თანდერთან დამარცხდა. მიუხედავად გუნდური მარცხისა, ბუკერი კვლავ გუნდის ლიდერად რჩება, რომელმაც გასულ სეზონში საშუალოდ 26.1 ქულა და 6 შედეგიანი გადაცემა დააგროვა.

ამ ცვლილებასთან დაკავშირებით ტექნიკური დეტალებიც მოგვარებულია. წინა სეზონში 15-ნომრიანი მაისურით მარკ უილიამსი თამაშობდა, თუმცა ის ამჟამად შეზღუდული თავისუფალი აგენტია, რაც იმას ნიშნავს, რომ ნომერი ბუკერისთვის თავისუფალია.