Crystalbet ეროვნული ლიგის მე-16 ტური დაძაბული დაპირისპირებებით გამოირჩა. ტურის ცენტრალურ მატჩში, „მიხეილ მესხის“ სტადიონზე, მოქმედმა ჩემპიონმა „იბერია 1999“-მა ბათუმის „დინამოს“ უმასპინძლა. შეხვედრის ბედი ერთადერთმა გოლმა გადაწყვიტა.

მატჩის 25-ე წუთზე ვახტანგ ბედოშვილმა ზუსტი დარტყმით ანგარიში გახსნა. ეს გოლი გამარჯვების მომტანი აღმოჩნდა. ამ შედეგით „იბერიამ“ „ტორპედოსთან“ სატურნირო უპირატესობა 4 ქულამდე გაზარდა, ხოლო ბათუმელთა ექვსმატჩიანი წაუგებელი სერია დასრულდა.

დრამა გორში: „სამგურალის“ გამარჯვება

თენგიზ ბურჯანაძის სახელობის სტადიონზე „დილამ“ წყალტუბოს „სამგურალს“ უმასპინძლა. გორელებმა მატჩი კარგად დაიწყეს და მე-15 წუთზე ბლანკსონ ანოფის გოლით დაწინაურდნენ.

„სამგურალმა“ ანგარიში 43-ე წუთზე, ველისოლის პენალტით გაათანაბრა. თუმცა შესვენებამდე გორელებმა კვლავ მოახერხეს უპირატესობის მოპოვება: ანოფის პასით შოთა შეყილაძემ „დილა“ წინ გაიყვანა.

მეორე ნახევარში კლაუდიო სებოლინიამ წონასწორობა აღადგინა. მატჩის ბედი 90-ე წუთზე გადაწყდა, როდესაც სებოლინიას პასით ვინისიუსმა დავით კერესელიძის კარი აიღო და „სამგურალს“ 3 ქულა მოუტანა.

„რუსთავის“ წარმატება

დავით პეტრიაშვილის სახელობის სტადიონზე „რუსთავმა“ „სპაერი“ მიიღო. მასპინძლები 29-ე წუთზე ჟან სოუზა დე ალმეიდას გოლით დაწინაურდნენ.

მეორე ტაიმში სტუმრებმა გიორგი ცეცხლაძის გოლით ანგარიში გაათანაბრეს. თუმცა, 82-ე წუთზე ავთანდილ გუჯაბიძემ გამარჯვების გოლი გაიტანა და „რუსთავმა“ 2:1 იმარჯვა.

ტურის დასკვნითი მატჩი ხვალ, 14:00 საათზე, წყალტუბოში გაიმართება, სადაც „მეშახტე“ თბილისის „დინამოს“ დაუპირისპირდება.