„ლივერპულის“ დაცვის ხაზში ცვლილებები იწყება. როგორც ცნობილი იტალიელი ჟურნალისტი, ნიკოლო სკირა იუწყება, გუნდის ფრანგი მცველი იბრაჰიმა კონატე „მერსისაიდული“ კლუბის დატოვებას გეგმავს. მხარეებს შორის მოქმედი ხელშეკრულების გახანგრძლივებაზე საუბარი აღარ მიდის.

კონატეს მიმართ ინტერესი არაბული კლუბებიდანაც არსებობდა. თუმცა, ფეხბურთელმა ყველა შეთავაზება უარყო და კარიერის გაგრძელება ევროპის ტოპ-ლიგაში არჩია.

ამ სიტუაციით მადრიდის „რეალი“ აქტიურად სარგებლობს. „სამეფო კლუბს“ სურს, რომ ტრანსფერი ივლისშივე დაიხუროს. მადრიდელებმა ფეხბურთელს უკვე წარუდგინეს საკუთარი პირობები, რომელიც 5-წლიან კონტრაქტს გულისხმობს.

შეგახსენებთ, რომ იბრაჰიმა კონატე „ლივერპულს“ 2021 წელს შეუერთდა. ამ პერიოდის განმავლობაში მან „წითლების“ მაისურით ყველა ტურნირზე ჯამში 183 შეხვედრა ჩაატარა. მცველმა საკუთარი წვლილი შეტევაშიც შეიტანა და გუნდს 7 გოლითა და 4 საგოლე გადაცემით დაეხმარა.

X (Twitter)ნახე პოსტი

„რეალის“ ინტერესი კონატეს მიმართ გასაკვირი არ არის, რადგან კარლო ანჩელოტის გუნდი დაცვის ხაზის გაახალგაზრდავებასა და გაძლიერებას ცდილობს. ფრანგი მცველის გამოცდილება პრემიერ ლიგაში და მისი ფიზიკური მონაცემები მადრიდელთა სათამაშო სტილს იდეალურად ერგება.