„ტოტენჰემის“ კაპიტანი კრისტიან რომერო კლუბისთვის გადამწყვეტ მომენტში თანაგუნდელებთან ერთად არ იქნება. 28 წლის მცველი, რომელიც მუხლის ტრავმის გამო სეზონის ფინალურ მატჩს „ევერტონის“ წინააღმდეგ გამოტოვებს, სამშობლოში, არგენტინაში გაემგზავრა.

ეს გადაწყვეტილება კლუბში დიდ ვნებათაღელვას იწვევს. მიუხედავად იმისა, რომ ტრავმირებული ფეხბურთელები, მათ შორის ბენ დევისი, გუნდს გვერდში უდგანან, რომერო არგენტინაში დარჩენას და თავისი ბავშვობის კლუბის, „ბელგრანოს“, მატჩისთვის თვალყურის დევნებას აპირებს.

მწვრთნელის განმარტება

მთავარმა მწვრთნელმა რობერტო დე ძერბიმ დაადასტურა, რომ რომეროს გამგზავრება სამედიცინო შტაბთან შეთანხმებული იყო. „მათ ერთად მიიღეს გადაწყვეტილება, რომ რეაბილიტაცია არგენტინაში დაესრულებინა“, — განაცხადა იტალიელმა სპეციალისტმა.

დე ძერბიმ აღიარა, რომ გულშემატკივრების უკმაყოფილება სავსებით გასაგებია. „100%-ით მესმის მათი. თუმცა, მე არ ვარ სულელი და თუ დავინახავ, რომ რომელიმე მოთამაშე კლუბზე წინ საკუთარ ინტერესებს აყენებს, რეაგირება მექნება. თუმცა, რომეროსთან დაკავშირებით პრეტენზია არ მაქვს“, — დასძინა მან.

მწვავე კრიტიკა ლეგენდებისგან

„ტოტენჰემის“ ყოფილმა კაპიტანმა და მწვრთნელმა გლენ ჰოდლიმ ფეხბურთელის საქციელს „სკანდალური“ უწოდა. მისი თქმით, რომეროს ადგილას ის აეროპორტში გაუშვებდა და გუნდში დაბრუნების უფლებას აღარ მისცემდა.

კრიტიკას შეუერთდა ლეგენდარული თავდამსხმელი ტედი შერინგემიც: „ეს კლუბის ისტორიაში ყველაზე მნიშვნელოვანი მატჩია. კაპიტანი გასახდელში უნდა იყოს, რომ თანაგუნდელებს მხარში ამოუდგეს. დაუჯერებელია, რომ ამის უფლება მისცეს“.

გადამწყვეტი ბრძოლა

„ტოტენჰემისთვის“ „ევერტონთან“ მატჩი პრემიერლიგაში დარჩენის გარანტია. გუნდს გამარჯვება სჭირდება, თუმცა ფრეც საკმარისი იქნება, თუ „ვესტ ჰემთან“ ბურთების შეფარდების უპირატესობას შეინარჩუნებენ. ლონდონური კლუბი პრემიერლიგის გათამაშებას არ გამოტოვებია 1977-78 წლების სეზონის შემდეგ.

ამჟამად რომერო არგენტინაში „ბელგრანოს“ საწვრთნელ ბაზას იყენებს, რათა ზაფხულის მსოფლიო ჩემპიონატისთვის ფორმაში ჩადგეს. დე ძერბის თქმით, მისი ფოკუსი მხოლოდ იმ მოთამაშეებზეა, რომლებიც კვირას მოედანზე გასვლას შეძლებენ.