ტექნოლოგიურ სამყაროში ახალი ტერმინი დამკვიდრდა — „RAMageddon“. ეს არის მეხსიერების ჩიპების გლობალური დეფიციტი, რომელიც ხელოვნური ინტელექტის (AI) განვითარებამ და აპარატურულ რესურსებზე მისმა დაუოკებელმა მოთხოვნამ გამოიწვია. Apple-ის მოქმედი აღმასრულებელი დირექტორი, ტიმ კუკი, მომხმარებლებს აფრთხილებს, რომ კომპანიის შემდეგი თაობის მოწყობილობები, სავარაუდოდ, უფრო ძვირი ეღირება.

Wall Street Journal-თან ინტერვიუში კუკმა განაცხადა, რომ ფასების მატება „გარდაუვალია“. მიუხედავად იმისა, რომ Apple ცდილობდა ჩიპების გაძვირებული ღირებულება საკუთარ თავზე აეღო, ხარჯები გასულ წელთან შედარებით ოთხჯერ გაიზარდა. კუკმა არსებულ ვითარებას „არამდგრადი“ უწოდა.

რა ელოდება iPhone-ის მომხმარებლებს?

მიუხედავად იმისა, რომ კომპანიას არ დაუსახელებია კონკრეტული მოდელები, ექსპერტები ვარაუდობენ, რომ ცვლილება უპირველეს ყოვლისა iPhone-ს შეეხება. Apple-ის მომდევნო სმარტფონის პრეზენტაცია სექტემბერშია დაგეგმილი, რაც ფასების კორექტირებისთვის იდეალური დროა.

კვლევითი ფირმა TechInsights-ის შეფასებით, იმისთვის, რომ Apple-მა არსებული მოგების მარჟა შეინარჩუნოს, iPhone 17 Pro-ს ფასი დამატებით 270 დოლარით უნდა გაიზარდოს. შეგახსენებთ, რომ ამ მოდელის საბაზისო ფასი ამჟამად 1 099 დოლარს შეადგენს.

პრობლემა მხოლოდ ფასებში არ არის

AI სტრატეგიის გარშემო Apple-ს სხვა სირთულეებიც აქვს. კომპანია უკვე აღმოჩნდა კრიტიკის ქარცეცხლში დაპირებული AI ფუნქციების დაგვიანების გამო. მიმდინარე წლის დასაწყისში Apple-მა 250 მილიონი დოლარი გადაიხადა სასამართლო დავის დასასრულებლად, რომელიც მცდარ რეკლამას უკავშირდებოდა.

ივნისის დასაწყისში გამართულ დეველოპერების კონფერენციაზე კომპანიამ წარმოადგინა გარკვეული პროგრესი, მათ შორის Siri-ს განახლებული ვერსია. თუმცა, მოწყობილობებში მეტი მონაცემთა დამუშავება ავტომატურად ნიშნავს მეხსიერების ჩიპების უფრო დიდ საჭიროებას. ეს კი ქმნის მანკიერ წრეს, სადაც ტექნოლოგიური პროგრესის საფასურს საბოლოოდ მომხმარებელი იხდის.