NASA-მ, Axiom Space-თან თანამშრომლობით, Artemis IV მისიისთვის განკუთვნილი ახალი აღჭურვილობის დეტალები გაასაჯაროვა. 2028 წელს დაგეგმილი მთვარის მისიის ასტრონავტები სპეციალურ თერმორეგულაციის სამოსს, ე.წ. LCVG-ს (Liquid Cooling and Ventilation Garment) გამოიყენებენ.

ეს სამოსი AxEMU-ს კოსმოსური კოსტიუმის შიდა ფენას წარმოადგენს. მისი მთავარი ფუნქცია ასტრონავტების სხეულის ტემპერატურის ოპტიმალურ დონეზე შენარჩუნება და კომფორტის უზრუნველყოფაა, რაც კოსმოსურ ვაკუუმში მუშაობისას კრიტიკულად მნიშვნელოვანია.

LCVG-ის მუშაობის პრინციპი ეფუძნება სამოსში ჩამონტაჟებულ მილაკებს, რომლებშიც ცივი წყალი ცირკულირებს. ეს სისტემა ასტრონავტის სხეულიდან ზედმეტ სითბოს აქტიურად გამოდევნის. წინა მოდელებისგან განსხვავებით, ახალი დიზაინი აღჭურვილია დამატებითი, სარეზერვო სისტემით, რომელიც ძირითადი მექანიზმის მწყობრიდან გამოსვლის შემთხვევაში ჩაირთვება.

გარდა თერმორეგულაციისა, სამოსი ასრულებს ვენტილაციის ფუნქციასაც. ის უზრუნველყოფს სუფთა ჟანგბადის მიწოდებას ჩაფხუტისთვის, ხოლო ამოსუნთქულ ნახშირორჟანგს სპეციალურ ფილტრებამდე მიმართავს, რათა ჟანგბადი ხელახლა გაიწმინდოს და ცირკულაციაში დაბრუნდეს.

9 ფოტო — დააჭირე გასადიდებლად

Prada-სა და Axiom Space-ის ეს თანამშრომლობა აერთიანებს მაღალ მოდასა და კოსმოსურ საინჟინრო გადაწყვეტილებებს. NASA-სთვის ეს პირველი შემთხვევა არ არის, როდესაც სამეცნიერო მიზნებისთვის მაღალტექნოლოგიურ დიზაინს იყენებს. მანამდე სააგენტომ დააფინანსა BioSuit-ის კონცეფცია, რომელიც MIT-ის პროფესორ დავა ნიუმენისა და არქიტექტორ გილერმო ტროტის ერთობლივი ნამუშევარი იყო.