Snap-ი გაძლიერებული რეალობის (AR) ბაზარზე აქტიურად შემოდის. კომპანიამ ოფიციალურად წარადგინა თავისი ახალი პროდუქტი — Specs, რომელსაც თავად „გამჭვირვალე AR სათვალეებში ჩაშენებულ სატარებელ კომპიუტერს“ უწოდებს. მოწყობილობის ფასი 2 195 დოლარია.

მსურველებს სათვალის წინასწარ დაჯავშნა უკვე შეუძლიათ specs.com-ზე, სადაც 200-დოლარიანი დეპოზიტის გადახდაა საჭირო. კომპანიის გეგმის მიხედვით, პირველი პარტია მომხმარებლებისთვის მიწოდებას ამ შემოდგომაზე დაიწყებს აშშ-ში, დიდ ბრიტანეთსა და საფრანგეთში.

ეს ნაბიჯი Snap-ისთვის გადამწყვეტია. კომპანია 2016 წლიდან ცდილობს ჭკვიანი სათვალეების მიმართულების განვითარებას. გენერალურმა დირექტორმა, ევან შპიგელმა, 2026 წელს მომხმარებლისთვის განკუთვნილი AR სათვალეების გამოშვება პირობად დადო და ამ მიზნით სათვალეების გუნდი ცალკე ბიზნეს ერთეულად ჩამოაყალიბა.

Specs-ის მთავარი უპირატესობა მისი ავტონომიურობაა. მოწყობილობა სრულად დამოუკიდებელია — არ საჭიროებს დამატებით კაბელებს ან გარე ბატარეებს, რითაც Snap-ი არაპირდაპირ უპირისპირდება Apple-ის Vision Pro-ს. სათვალე ორი ზომის იქნება: 47 მმ (132 გრამი) და 52 მმ (136 გრამი). დიზაინი ითვალისწინებს მოსახსნელ ჩანართებს, რაც მხედველობის კორექციისთვის საჭირო ლინზების დამონტაჟების საშუალებას იძლევა.

ვიზუალურად Specs მეტად თვალშისაცემია და Meta-ს უფრო დახვეწილ, „Ray-Ban-ის სტილის“ სათვალეებს არ ჰგავს. მოწყობილობა აღჭურვილია ხილული და ინფრაწითელი კამერებით. ჩაწერის პროცესში სათვალის ცენტრში პატარა LED ზოლი ინთება, რაც კონფიდენციალურობის ნორმების დაცვას ემსახურება.

ტექნიკური მხარე მოიცავს „თხევადი კრისტალი სილიციუმზე“ ტექნოლოგიას, რომელიც 51-გრადუსიან ხედვის არეს და 16 მილიონ ფერს უზრუნველყოფს. ლინზებს ავტომატურად დაბნელება 10 წამში შეუძლიათ. სათვალეში ჩამონტაჟებულია ორი Snapdragon-ის პროცესორი: ერთი კომპიუტერული ხედვისთვის, მეორე კი AR აპლიკაციების მუშაობისთვის.

ბატარეის ხანგრძლივობა ერთჯერადი დატენვით დაახლოებით ოთხი საათია. კომპლექტში შემავალი დამტენი ქეისი მოწყობილობას დამატებით ოთხჯერ დატენის, რაც ჯამში 20-საათიან მუშაობას უზრუნველყოფს. ევან შპიგელის თქმით, შესაძლებელია სათვალის მაგნიტური კაბელით დატენვაც, რომელიც პარალელურად ტელეფონიდან ან კომპიუტერიდან კონტენტის სტრიმინგის შესაძლებლობასაც იძლევა.