აშშ-ის პრეზიდენტმა დონალდ ტრამპმა „დიდი შვიდეულის“ სამიტის ფარგლებში გააკეთა განცხადება, რომელიც რუსული ენერგომატარებლების საერთაშორისო ბაზარზე არსებულ შეზღუდვებს ეხება. ტრამპის თქმით, ვაშინგტონი განიხილავს რუსულ ნავთობზე დაწესებული სანქციების შემსუბუქების რეჟიმის შეწყვეტას.

აღნიშნული შეღავათები, რომლებიც ქვეყნებს რუსული ნავთობის შეძენის უფლებას აძლევდა, თავდაპირველად მსოფლიო ბაზარზე ფასების მკვეთრი ზრდის შესაკავებლად დაწესდა. ეს საჭიროება განსაკუთრებით აქტუალური გახდა ახლო აღმოსავლეთში კონფლიქტის გამწვავებისა და ჰორმუზის სრუტის ბლოკირების ფონზე.

ტრამპის განმარტებით, ირანთან მიღწეული შეთანხმება და ნავთობის მიწოდების ჯაჭვის აღდგენა აშშ-ს აძლევს შესაძლებლობას, უარი თქვას დამატებით გამონაკლისებზე. „მალე ამის გაკეთებას შევძლებთ, რადგან ნავთობის მიწოდება უკვე აღდგა“, — განაცხადა აშშ-ის პრეზიდენტმა.

3 ფოტო — დააჭირე გასადიდებლად

ამ გადაწყვეტილებას ევროპელი მოკავშირეები დიდი ხანია ითხოვენ. მათი პოზიციით, რუსული ნავთობის ექსპორტის შემოსავლების მაქსიმალური შეზღუდვა კრიტიკულად მნიშვნელოვანია, რათა მოსკოვმა უკრაინის წინააღმდეგ მიმდინარე ომის დაფინანსება ვეღარ შეძლოს.

აღნიშნული გამონაკლისები ვრცელდებოდა იმ ნავთობზე, რომელიც ტრანსპორტირების პროცესში იყო. სანქციების რეჟიმის გამკაცრება, სავარაუდოდ, მნიშვნელოვან გავლენას მოახდენს რუსული ნავთობის რეალიზაციაზე გლობალურ ბაზრებზე.