Spotify-მა ოფიციალურად გაუშვა ფუნქცია სახელწოდებით „Reserved by Spotify“, რომელიც მიზნად ისახავს ყველაზე აქტიური მსმენელებისთვის კონცერტის ბილეთებზე წვდომის გამარტივებას. სისტემა ავტომატურად განსაზღვრავს არტისტის „სუპერფანებს“ და მათთვის ორი ბილეთის შეძენის უფლებას მანამ დაჯავშნის, სანამ საჯარო გაყიდვები დაიწყება.

სიახლე პირველ ეტაპზე აშშ-ში, 18 წელს გადაცილებული პრემიუმ-მომხმარებლებისთვისაა ხელმისაწვდომი. პირველი არტისტი, რომლის ტურნეს ფარგლებშიც გულშემატკივრები ამ სისტემით ისარგებლებენ, Role Model-ია. მსმენელები დაჯავშნილი ბილეთების შესახებ შეტყობინებებს 23 ივნისიდან მიიღებენ.

სტრატეგიის მთავარი მიზანი „სკალპერების“ (გადამყიდველების) წინააღმდეგ ბრძოლაა, რომლებიც ავტომატიზებული პროგრამების გამოყენებით ბილეთებს სწრაფად ითვისებენ და შემდეგ გაცილებით ძვირად ყიდიან. Spotify ხაზს უსვამს, რომ ტრანზაქციებზე არანაირ საკომისიოს არ დააკისრებს.

როგორ მუშაობს სისტემა?

Spotify-ის ალგორითმი აქტიურობას სხვადასხვა სიგნალის საფუძველზე აფასებს. მათ შორისაა სიმღერების მოსმენის სიხშირე და მათი გაზიარება. კომპანია ირწმუნება, რომ სისტემა მკაცრად გააკონტროლებს „ბოტების“ ან ხელოვნური ინტელექტის გამოყენებას. მუსიკის ფონურ რეჟიმში დაუსრულებლად ჩართვა უპირატესობას არავის მისცემს — პლატფორმა ეძებს რეალურ, ადამიანურ ინტერაქციას.

გარდა ამისა, სისტემა ითვალისწინებს მომხმარებლის გეოგრაფიულ მდებარეობას, რათა დარწმუნდეს, რომ მსმენელი კონცერტის ჩატარების ადგილთან ახლოს იმყოფება. მას შემდეგ, რაც მომხმარებელი შეთავაზებას მიიღებს, მას Spotify-ის მთავარ ეკრანზე გამოუჩნდება ინფორმაცია ტურნეს თარიღების შესახებ, სადაც შეძლებს ბილეთების დაჯავშნას და შეძენას.

შეზღუდვები და სამომავლო გეგმები

Image Credits:Spotify

აღსანიშნავია, რომ სერვისი ამჟამად მხოლოდ იმ არტისტებზე ვრცელდება, რომლებიც Live Nation-ის სივრცეებში გამოდიან, ბილეთების გაყიდვა კი Ticketmaster-ის პლატფორმის მეშვეობით ხორციელდება. კომპანია გეგმავს პარტნიორების წრის გაფართოებას და სერვისის ხელმისაწვდომობას უფრო მცირე ზომის დარბაზებისთვისაც.

Spotify აღიარებს, რომ მოთხოვნა ბევრ შემთხვევაში მიწოდებას აჭარბებს, ამიტომ ბილეთების შეთავაზებას ყველა „სუპერფანი“ ვერ მიიღებს. მიუხედავად ამისა, ეს ნაბიჯი პლატფორმისთვის მნიშვნელოვანია, რადგან ის მომხმარებლებს პრემიუმ-გამოწერის შენარჩუნებისა და აპლიკაციაში უფრო აქტიური ჩართულობისკენ უბიძგებს.