ლონდონის ოლდ ბეილის სასამართლომ ორი მამაკაცი ჩინეთისა და ჰონგ-კონგის სპეცსამსახურების სასარგებლოდ ჯაშუშობისთვის პატიმრობით დასაჯა. 66 წლის ჩუნგ ბიუ იუენი და 41 წლის ჩი ლეუნგ ვაი, რომლებიც დიდი ბრიტანეთისა და ჩინეთის ორმაგი მოქალაქეები არიან, ბრალდებულები იყვნენ დისიდენტებზე თვალთვალსა და ინფორმაციის შეგროვებაში.

სასამართლოს გადაწყვეტილებით, იუენს 8 წლით, ხოლო ვაის 10 წლით თავისუფლების აღკვეთა მიესაჯა. ეს პირველი შემთხვევაა, როდესაც ბრიტანეთში ვინმე ჩინეთის სასარგებლოდ ჯაშუშობისთვის გაასამართლეს.

დანაშაულებრივი სქემა

გამოძიებამ დაადგინა, რომ 2023 წლის დეკემბრიდან 2024 წლის მაისამდე პერიოდში ბრალდებულები აქტიურად უთვალთვალებდნენ დიდ ბრიტანეთში მცხოვრებ ჰონგ-კონგელ აქტივისტებს. ჩი ლეუნგ ვაი, რომელიც ბრიტანეთის საზღვრის დაცვის სამსახურში (Border Force) მუშაობდა, ბოროტად იყენებდა სამსახურებრივ მდგომარეობას.

ის შინაგან საქმეთა სამინისტროს მონაცემთა ბაზაში წვდომას იყენებდა, რათა დაედგინა იმ ადამიანების ვინაობა და ადგილსამყოფელი, რომლებიც ჩინეთის ხელისუფლების ოპონენტებად ითვლებოდნენ. მათი დანაშაულებრივი საქმიანობა მას შემდეგ გახდა ცნობილი, რაც 2024 წლის 1 მაისს მათ სცადეს ჰონგ-კონგის ყოფილი მცხოვრების, მონიკა კვონგის გატაცება იორკშირში მდებარე მისი სახლიდან.

სასამართლოს შეფასება

მოსამართლე ბობი ჩიმა-გრაბმა აღნიშნა, რომ ბრიტანეთი დღეს უცხო სახელმწიფოების მუდმივი და ფარული ჩარევის წინაშე დგას. მისი თქმით, თანამედროვე დაზვერვითი საქმიანობა აღარ შემოიფარგლება მხოლოდ სამხედრო თუ სამთავრობო საიდუმლოებებით.

თანამედროვე დაზვერვა მოიცავს თვალთვალს, დაშინებას და დისიდენტების დევნას, რომლებიც ჩვენი კანონების დაცვის ქვეშ იმყოფებიან, - განაცხადა მოსამართლემ.

ლონდონის კონტრტერორისტული პოლიციის მეთაურმა ჰელენ ფლანაგანმა განაცხადა, რომ დაკავებულების ქმედებები „შემაძრწუნებელი“ იყო. მისი თქმით, ბრალდებულები მიზანმიმართულად ატერორებდნენ ადამიანებს, რომლებიც მშვიდობიანი პროტესტის ფარგლებში ჰონგ-კონგისა და ჩინეთის ხელისუფლების პოლიტიკას აკრიტიკებდნენ.

თავის მხრივ, ლონდონში ჩინეთის საელჩომ ეს სასამართლო პროცესი „პოლიტიკურ მანიპულაციად“ და კანონის ბოროტად გამოყენებად შეაფასა. ბრალდებულებმა სასამართლოზე თავდაპირველად ყველა ბრალდება უარყვეს, თუმცა მტკიცებულებების საფუძველზე მათი ბრალეულობა დამტკიცდა.