ინგლისსა და უელსში ე.წ. „ახალი პოლიტიკური პატიმრების“ ფენომენი ყალიბდება. ლონდონის ქუინ მერის უნივერსიტეტისა და ჯგუფ „Defend Our Juries“-ის ერთობლივი კვლევის თანახმად, კლიმატური ცვლილებებისა და ღაზაში მიმდინარე ომის გასაპროტესტებლად გამოსული ადამიანების წინააღმდეგ სასამართლო სისტემა სულ უფრო მკაცრ ზომებს იღებს.

სტატისტიკა შთამბეჭდავია: მკვლევარებმა გამოავლინეს 286 შემთხვევა, როდესაც აქტივისტებს პატიმრობა მიესაჯათ. მათ მიერ მოხდილი სასჯელის ჯამურმა ხანგრძლივობამ 136 წელი შეადგინა. თუ ადრე სამოქალაქო დაუმორჩილებლობისთვის პატიმრობა იშვიათი გამონაკლისი იყო, დღეს ის სისტემურ ხასიათს იღებს.

ციხეები და წინასწარი პატიმრობა

კვლევის ავტორები ხაზს უსვამენ წინასწარი პატიმრობის პრაქტიკას, რომელსაც „თავდასხმის პირველ ხაზს“ უწოდებენ. საქმეების 60%-ში საბოლოო განაჩენი უფრო რბილი აღმოჩნდა, ვიდრე ის დრო, რომელიც აქტივისტებმა განაჩენის მოლოდინში ციხეში გაატარეს.

განსაკუთრებით აღსანიშნავია ე.წ. „Filton 24“-ის შემთხვევა. პალესტინის მხარდამჭერი აქტივისტები, რომლებიც ისრაელური იარაღის მწარმოებელი კომპანიის ქარხანასთან აპროტესტებდნენ, 18 თვემდე წინასწარ პატიმრობაში იმყოფებოდნენ, მაშინ როცა კანონით გათვალისწინებული სტანდარტული ლიმიტი 6 თვეა.

სასამართლოსადმი უპატივცემულობა

პატიმრობის შემთხვევების 40% სასამართლოსადმი უპატივცემულობის ბრალდებას უკავშირდება. ეს ხდება მაშინ, როდესაც მოქალაქეები არღვევენ მოსამართლის განკარგულებას ან კერძო კომპანიების მიერ მოპოვებულ სასამართლო აკრძალვებს (injunctions).

პროფესორი დევიდ უაითი აცხადებს, რომ საფრთხე მდგომარეობს კერძო კომპანიების გავლენაში. მისი თქმით, კერძო სტრუქტურების მიერ მოპოვებული აკრძალვების დარღვევა ხშირად სისხლის სამართლის პასუხისმგებლობით სრულდება, რაც აქტივისტების მასობრივ დაპატიმრებებს იწვევს.

„ეს არის გამონაკლისი სასჯელები, რომლებიც გამოიყენება პროტესტის წინააღმდეგ. ეს ქმედებები ფუნდამენტურად პოლიტიკურია და ხშირად ასახავს საზოგადოების უმრავლესობის შეხედულებებს და არა უმცირესობის“, — აღნიშნავს უაითი.

საპასუხოდ, სასამართლო ხელისუფლების სპიკერმა განაცხადა, რომ მოსამართლეები მოქმედებენ დამოუკიდებლად, კანონისა და პარლამენტის მიერ დადგენილი გაიდლაინების შესაბამისად. მათი თქმით, გადაწყვეტილებები ეფუძნება მხოლოდ წარმოდგენილ მტკიცებულებებსა და ფაქტებს.