ჰონგ-კონგის სამართალდამცავმა ორგანოებმა გასული წლის ნოემბერში Wang Fuk-ის საცხოვრებელ კომპლექსში მომხდარი დამანგრეველი ხანძრის საქმეზე გამოძიება დაასრულეს და პირველი ოფიციალური ბრალდებები წარადგინეს. ეს ტრაგედია ქალაქის ისტორიაში ბოლო 7 ათწლეულის განმავლობაში ყველაზე მასშტაბურ ხანძრად მიიჩნევა, რომელმაც 168 ადამიანის სიცოცხლე შეიწირა.

ვინ და რა მუხლებით არის ბრალდებული?

გამოძიების ცნობით, ბრალი წაეყენა ორ კომპანიას და შვიდ ფიზიკურ პირს. მათ საერთო ჯამში 25 მუხლით უწევთ პასუხისგება, მათ შორის: გაუფრთხილებლობით სიცოცხლის მოსპობა, თაღლითური გარიგებები, მართლმსაჯულებისთვის ხელის შეშლა და გადასახადებისგან თავის არიდება.

ბრალდებულთა სიაში მოხვდნენ პროექტის საკონსულტაციო ფირმა Will Power Architects და მთავარი კონტრაქტორი Prestige Construction and Engineering. ორივე კომპანიას გაუფრთხილებლობით სიცოცხლის მოსპობის ბრალდება აქვს წაყენებული.

პასუხისმგებელი პირები

სასამართლომ ბრალდებულებად ცნო შემდეგი პირები:

  • Prestige-ის დირექტორი, 52 წლის ჰო კინ-იპი;
  • Will Power-ის დირექტორი, 40 წლის ვონგ ჰაპ-ინი;
  • Will Power-ის რეგისტრირებული ინსპექტორი, 44 წლის ნგ იეკი.

აღნიშნულ პირებს სასამართლომ გირაოს უფლება არ მისცა და ისინი წინასწარ პატიმრობაში რჩებიან.

რამ გამოიწვია მასშტაბური ხანძარი?

დამოუკიდებელმა საგამოძიებო კომისიამ დაადგინა, რომ ტრაგედია სისტემური დარღვევების შედეგი იყო. კომისიის წამყვანი იურისტის, ვიქტორ დოუსის განცხადებით, ხანძრის დღეს უსაფრთხოების თითქმის ყველა სისტემამ ფუნქცია დაკარგა.

გამოძიებამ გამოავლინა, რომ რვა საცხოვრებელი ბლოკიდან შვიდში სახანძრო სიგნალიზაცია გამორთული იყო, ხოლო ფანჯრები აალებადი ქაფის პანელებით იყო დახურული. ადგილობრივი მაცხოვრებლების თქმით, სამშენებლო სამუშაოების დროს მუშები ხშირად აგდებდნენ ანთებულ სიგარეტის ნამწტებს, რაც ხანძრის კერების გაჩენის საფრთხეს ქმნიდა.

კორუფციული კვალი და შემდგომი ნაბიჯები

გარდა ხანძრის საქმისა, ბრალდებულები კორუფციულ დანაშაულებშიც არიან მხილებულნი. ჰონგ-კონგის ანტიკორუფციულმა სამსახურმა მათ წინააღმდეგ თაღლითობის, ფულის გათეთრებისა და მოწმეებზე ზეწოლის მუხლებით დაიწყო საქმის წარმოება. გამოძიების ცნობით, ბრალდებულები ცდილობდნენ მტკიცებულებების დამალვას, მათ შორის დიდი რაოდენობით ნაღდი ფულის გადამალვას.

საქმის განხილვა 2 სექტემბრამდე გადაიდო, რათა გამომძიებლებმა დამატებითი დეტალები დააზუსტონ. ამ დროისთვის, სულ დაკავებულია 35 პირი, თუმცა მათგან რამდენს წარედგინა ოფიციალური ბრალი, ჯერჯერობით უცნობია.