ლონდონის სასამართლომ ნიგერიის ნავთობის ყოფილი მინისტრი, 65 წლის დიზანი ელისონ-მადუეკე, ქრთამის აღების საქმეზე ყველა ბრალდებაში უდანაშაულოდ ცნო. სასამართლო პროცესი, რომელიც 13 წელი გრძელდებოდა, ბრიტანეთის ეროვნული კრიმინალური სააგენტოსთვის (NCA) სერიოზულ მარცხად შეფასდა.

ელისონ-მადუეკეს, რომელიც ნიგერიის ნავთობის მინისტრის პოსტს 2010-2015 წლებში იკავებდა, ბრალი ედებოდა ნავთობკომპანიების ხელმძღვანელებისგან ძვირადღირებული საჩუქრებისა და მომსახურების მიღებაში. საუბარი იყო ლონდონში მდიდრულ საცხოვრებლებში ცხოვრებასა და სხვადასხვა სახის ხარჯების დაფარვაზე.

სასამართლო პროცესის მიმდინარეობისას ბრალდების მხარემ ვერ წარმოადგინა მტკიცებულებები, რომლითაც დადასტურდებოდა, რომ მინისტრმა კონტრაქტები კონკრეტულ ბიზნესმენებს ქრთამის სანაცვლოდ გადასცა. თავად ყოფილი მინისტრი აცხადებდა, რომ ის პირიქით, კორუფციის წინააღმდეგ მებრძოლი ფიგურა იყო.

სასამართლოში ელისონ-მადუეკემ საკუთარ თავს „პროცედურების დამცველი“ უწოდა. მისი თქმით, ნიგერიის მკაცრად პატრიარქალურ საზოგადოებაში ქალის მიერ მაღალი თანამდებობის დაკავება ბევრისთვის მიუღებელი იყო, რის გამოც ის ოპონენტების სამიზნე გახდა. მან ასევე აღნიშნა, რომ ლონდონში ოფიციალური ვიზიტებისას მისი დეპარტამენტის ოფისი არასათანადო მდგომარეობაში იყო, რის გამოც იძულებული გახდა, ბიზნესმენების დახმარებით დაეფარა ხარჯები, რასაც შემდგომ ნიგერიაში ანაზღაურებდა.

სასამართლომ უდანაშაულოდ ცნო საქმესთან დაკავშირებული სხვა პირებიც, მათ შორის ელისონ-მადუეკეს ძმა, დოიე აგამა, რომელიც მანჩესტერის ეკლესიის არქიეპისკოპოსია. ასევე გაამართლეს ნავთობის სექტორის აღმასრულებელი დირექტორი ოლატიმბო აიინდე, რომელსაც ბრალად ქრთამის მიცემა ედებოდა. აიინდეს ადვოკატების განცხადებით, მათი კლიენტი სინამდვილეში ნიგერიის ხელისუფლებისთვის საიდუმლო ინფორმატორი იყო და კორუფციული სქემების მხილებას ცდილობდა.

დაცვის მხარემ პროცესის განმავლობაში არაერთხელ გააკრიტიკა ბრიტანული მართლმსაჯულების სისტემა. ადვოკატების მტკიცებით, საქმეში არსებული არაერთი მნიშვნელოვანი დოკუმენტი ნიგერიაში გაუჩინარდა, ხოლო გამოძიებამ 11 წელზე მეტი ხნის განმავლობაში ვერ შეძლო საქმის დასრულება, რაც ბრალდებულებისთვის აუტანელ ტვირთად იქცა.

განაჩენის გამოცხადების შემდეგ ელისონ-მადუეკემ განაცხადა, რომ მისი „კოშმარი დასრულდა“. მან აღნიშნა, რომ 11-წლიანი გაუთავებელი გამოძიება და საჯარო კრიტიკა მისი ოჯახისთვის მძიმე ფსიქოლოგიური ტვირთი იყო.

Getty Images