აშშ-ის პრეზიდენტმა დონალდ ტრამპმა საფრანგეთში, G7-ის სამიტის ფარგლებში გამართულ ორმხრივ შეხვედრაზე, ინდოეთში ვიზიტის პირობა დადო. ეს გადაწყვეტილება ორ ქვეყანას შორის ბოლო პერიოდში გაციებული ურთიერთობების დათბობაზე მიანიშნებს.

ტრამპმა განაცხადა, რომ ვიზიტი „მომავალში, გარკვეულ დროს“ შედგება. მისი თქმით, ვაშინგტონი და ნიუ-დელი სავაჭრო შეთანხმების გაფორმების ბოლო ეტაპზე იმყოფებიან. ინდოეთის კომერციის მდივნის განცხადებით, დელეგაციები მომავალ კვირას დელიში შეხვედრას გამართავენ, რათა გარიგებას „საბოლოო შტრიხები“ შემატონ.

Reuters

ორ ქვეყანას შორის ურთიერთობა მას შემდეგ დაიძაბა, რაც ტრამპმა ინდოეთის წინააღმდეგ საბაჟო ტარიფების დაწესება დააანონსა. სიტუაცია კიდევ უფრო გართულდა მას შემდეგ, რაც აშშ-ის სამხედრო ძალებმა ომანის ყურეში ირანული პორტების ბლოკადის დარღვევაში ეჭვმიტანილი ტანკერი დაბომბეს, რა დროსაც სამი ინდოელი მეზღვაური დაიღუპა.

პრემიერ-მინისტრმა ნარენდრა მოდიმ სამიტზე ტრამპთან საუბრისას ჰორმუზის სრუტეში ინდოელი მეზღვაურების უსაფრთხოების საკითხი დააყენა. მოდიმ ხაზი გაუსვა, რომ მსოფლიოს დღეს „ნდობის დეფიციტი“ აწუხებს და პარტნიორობის მომავალი სწორედ ამ ნდობის აშენებაზეა დამოკიდებული.

ტრამპმა მოდის „მკაცრი მომლაპარაკებელი“ უწოდა. თავდაცვის სფეროში არსებულ კითხვებზე პასუხისას კი პრეზიდენტმა განაცხადა, რომ აშშ ინდოეთს აუცილებლად დაეხმარება, თუ მას თავს დაესხმებიან.

აღსანიშნავია, რომ ინდოეთი ნავთობის იმპორტის 90%-ს საზღვარგარეთიდან იღებს. ირანის ირგვლივ მიმდინარე კონფლიქტი და ჰორმუზის სრუტის ჩაკეტვა ქვეყნის ენერგოუსაფრთხოებისთვის სერიოზულ გამოწვევად იქცა. გლობალური მიწოდების სტაბილიზაციას, სრუტის გახსნის შემთხვევაშიც კი, შესაძლოა თვეები დასჭირდეს.

ბოლო წელიწადში დაძაბულობის სხვა მიზეზებს შორის იყო ტრამპის პრეტენზიები ქაშმირის საკითხში მედიაციის შეთავაზებაზე, რაც ინდოეთმა კატეგორიულად უარყო. ასევე, აშშ-ის მიერ საიმიგრაციო პოლიტიკის გამკაცრება და H-1B ვიზების შეზღუდვა, რაც ინდოელი სპეციალისტებისთვის მტკივნეული თემაა.