საფეხბურთო სამყაროს ყურადღება ლოს-ანჯელესისკენ არის მიპყრობილი. 2026 წლის მსოფლიო ჩემპიონატის გახსნით შეხვედრაში აშშ-ის ნაკრები პარაგვაის უპირისპირდება. ეს არის ისტორიული მომენტი, რადგან შეერთებული შტატები სამ ათწლეულზე მეტი ხნის შემდეგ, პირველად მასპინძლობს მუნდიალს.

მატჩი SoFi Stadium-ზე გაიმართება. გულშემატკივართა მოლოდინი დიდია, რადგან მასპინძელი გუნდისგან 1994 წლის შედეგის გაუმჯობესებას ელიან.

პოლიტიკური და სპორტული ინტრიგა

მატჩის დაწყებამდე მთავარი კითხვა აშშ-ის პრეზიდენტის, დონალდ ტრამპის დასწრებას უკავშირდება. ოფიციალურად მისი სტუმრობა ჯერ არ დადასტურებულა, თუმცა პარაგვაის პრეზიდენტმა სანტიაგო პენიამ უკვე დაადასტურა ლოს-ანჯელესში ჩასვლა.

აშშ-ის ნაკრების მთავარი ვარსკვლავი კრისტიან პულიშიჩია, რომელსაც „კაპიტან ამერიკას“ უწოდებენ. 27 წლის შემტევი, რომელიც „მილანში“ ასპარეზობს, ფორმაშია და სენეგალთან ამხანაგურ მატჩშიც გამოიჩინა თავი. მასთან ერთად გუნდს ვესტონ მაკკენი და ფოლარინ ბალოგუნი გაუძღვებიან.

დაცვის პრობლემები და პარაგვაის ტაქტიკა

მიუხედავად ძლიერი შეტევისა, აშშ-ის დაცვაში სერიოზული ხარვეზებია. გუნდმა ბოლო 13 მატჩიდან მხოლოდ ერთში შეძლო კარის მშრალად შენახვა, რაც მეკარე მეტ ფრისისთვის სერიოზულ გამოწვევას წარმოადგენს.

საპირისპირო ვითარებაა პარაგვაის ბანაკში. გუნდი, რომელიც რეიტინგით ჯგუფში ყველაზე დაბლა (41-ე ადგილი) დგას, დაცვითი სტილით გამოირჩევა. თუმცა, მათ სერიოზული დანაკლისი აქვთ – წამყვანი თავდამსხმელი ხულიო ენსისო ტრავმის გამო ვერ ითამაშებს.

ჯგუფის პერსპექტივები

D ჯგუფში, აშშ-ისა და პარაგვაის გარდა, ავსტრალია და თურქეთი არიან. Opta Analyst-ის პროგნოზით, აშშ-ს გამარჯვების 40.1%-იანი შანსი აქვს, პარაგვაის – 33.3%, ხოლო ფრის ალბათობა 26.6%-ია.

მატჩი ქართველი გულშემატკივრებისთვისაც საინტერესოა, რადგან ეს ტურნირი მსოფლიო ფეხბურთის ახალი ერას დასაწყისია – გაფართოებული ფორმატით, სადაც 48 გუნდი მონაწილეობს.