საკრივო სამყარო სენსაციას გადაურჩა. ეგვიპტეში, პირამიდების ფონზე გამართულ სატიტულო ბრძოლაში, უკრაინელმა მძიმეწონოსანმა ოლექსანდრ უსიკმა ყოფილი კიკბოქსიორი რიკო ვერჰოვენი მე-11 რაუნდში, ბრძოლის დასრულებამდე სულ რაღაც ერთი წამით ადრე დაამარცხა. ეს გამარჯვება უსიკისთვის რიგით 25-ე დაუმარცხებელი ბრძოლა გახდა.

მოულოდნელი წინააღმდეგობა

„Glory in Giza“-დ წოდებული საღამო თავიდანვე ცალმხრივ დაპირისპირებად მიიჩნეოდა. თუმცა, ვერჰოვენმა, რომელსაც პროფესიონალურ რინგზე 12 წლის განმავლობაში არ უჩხუბია, მოლოდინები გააცამტვერა. ნიდერლანდელი სპორტსმენი უსიკს მძიმე დარტყმებით უტევდა და ჩემპიონს თავს კომფორტულად არ აგრძნობინებდა.

უსიკი, რომელიც კარიერაში ყველაზე მძიმე წონით წარსდგა რინგზე, გარკვეულ მომენტებში ლეთარგიულად გამოიყურებოდა. მეოთხე რაუნდის გარდა, სადაც უკრაინელმა უპირატესობა აშკარად მოიპოვა, ვერჰოვენი ინიციატივას ხელიდან არ უშვებდა.

მსაჯების შეფასება და გადამწყვეტი დარტყმა

The Ring-ის მონაცემებით, მე-11 რაუნდის წინ ბრძოლა თანაბარი იყო. ორი მსაჯის შეფასებით ანგარიში 95-95 გახლდათ, ხოლო მესამეს მონაცემებით, რიკო ვერჰოვენი 96-94 ამარცხებდა ჩემპიონს. დაძაბულობა პიკს აღწევდა.

გადამწყვეტი მომენტი რაუნდის დასასრულს დადგა. უსიკმა მარჯვენა აპერკოტით მეტოქე იატაკზე გააგდო. მიუხედავად იმისა, რომ ვერჰოვენმა 10-მდე დათვლა მოასწრო, მსაჯმა ბრძოლის გაგრძელება აღარ დაუშვა და ტექნიკური ნოკაუტი დააფიქსირა.

„ეს იყო რთული ბრძოლა. მადლობა ღმერთს. მარჯვენა აპერკოტი – ბანგ, ბანგ, ბანგ,“ – განაცხადა უსიკმა შეხვედრის შემდეგ.

ემოციური ფონი

ბრძოლის დასრულების შემდეგ უსიკმა უკრაინაში მიმდინარე ომზე ისაუბრა. ჩემპიონმა აღნიშნა, რომ მისი ოჯახი და თანამემამულეები ამჟამად ბომბსაფარებში იმყოფებიან. „ჩემმა შვილმა მომწერა: პაპა, მე შენ მიყვარხარ, შენ გაიმარჯვე, მეშინიაო. ეს საშინელებაა“, – განაცხადა უსიკმა.

რიკო ვერჰოვენმა მსაჯის გადაწყვეტილება გააპროტესტა და განაცხადა, რომ სურდა ბრძოლა ბოლო წამამდე გაგრძელებულიყო, თუმცა იქვე მადლობა გადაუხადა ჩემპიონს შესაძლებლობისთვის და რემატჩის სურვილი გამოთქვა.