აშშ-ის ფასიანი ქაღალდების და ბირჟების კომისიამ (SEC) რეგულაციების გადახედვა დაიწყო, რაც საფონდო ბაზრის ტოკენიზაციის პროცესს ახალ ეტაპზე გადაიყვანს. კომისიის ინიციატივა მიზნად ისახავს „611-ე“ და „610(e)“ წესების გაუქმებას, რომლებიც ამჟამად ბაზრის სტრუქტურას მკაცრად ზღუდავს.

აღნიშნული რეგულაციები, კერძოდ „611-ე წესი“, კრძალავს ე.წ. „trade-through“-ს, რაც ნიშნავს, რომ აქციების შეკვეთა არ შეიძლება შესრულდეს იმაზე უარეს ფასად, ვიდრე ეს სხვა ბირჟაზეა ხელმისაწვდომი. მეორე მხრივ, 610(e) წესი ბირჟებს უკრძალავს ფასების ისეთ ჩვენებას, რომელიც სხვა პლატფორმებთან შედარებით არაკონკურენტულია.

Galaxy-ის კვლევების ხელმძღვანელი ალექს თორნი მიიჩნევს, რომ ეს ცვლილება დეცენტრალიზებული ფინანსების (DeFi) სექტორისთვის გარდამტეხი იქნება. მისი თქმით, ეს არის ერთ-ერთი ყველაზე მნიშვნელოვანი ნაბიჯი ტოკენიზებული აქციებით ვაჭრობის სტრუქტურული ბარიერების მოსახსნელად.

პრობლემა მდგომარეობს ავტომატიზებულ მარკეტ-მეიკერებში (AMM). ეს პროგრამები ვაჭრობას აქტივების გაერთიანებით ახორციელებენ და მათთვის შეუძლებელია არსებული წესების დაცვა, რადგან ისინი შეკვეთებს „პულის“ მიმდინარე ფასის მიხედვით ასრულებენ. შედეგად, ამჟამინდელი რეგულაციებით, ნებისმიერი ასეთი პლატფორმა ტექნიკურად „არალეგალურ სავაჭრო ცენტრად“ ითვლება.

ალექს თორნის განმარტებით, AMM-ების ფასები მუდმივად მერყეობს, რაც არღვევს არსებულ მოთხოვნებს, რომლებიც ინვესტორებისთვის საუკეთესო ფასის გარანტირებას ცდილობს. SEC გეგმავს, რომ ეს მოძველებული წესები „საუკეთესო შესრულების“ (best execution) ჩარჩოთი ჩაანაცვლოს, რაც ტოკენიზებულ აქტივებს ლეგალურ სივრცეში მოაქცევს.

კომისიამ უკვე დაიწყო 60-დღიანი პერიოდი საჯარო განხილვებისთვის. ამ ხნის განმავლობაში მარეგულირებელი მიიღებს კომენტარებს ბაზრის მონაწილეებისგან და შესაძლოა, წინადადებებში გარკვეული კორექტივებიც შეიტანოს. ეს ინიციატივა SEC-ის უფრო ფართო სტრატეგიის ნაწილია, რომელიც 2025 წლის აგვისტოში, „Project Crypto“-ს ფარგლებში დაიწყო და მიზნად ისახავს ციფრული აქტივების რეგულირების თანამედროვე სტანდარტების შექმნას 2030 წლამდე.