იტალიურმა ბანკმა, Banco BPM-მა, ოფიციალურად განაცხადა, რომ Banca Monte dei Paschi di Siena-სთან (MPS) პოტენციური გაერთიანების შესახებ მოლაპარაკებებს იწყებს. ეს ნაბიჯი იტალიის საბანკო სექტორში ახალ რეალობას შექმნის და ქვეყნის სიდიდით მეორე ფინანსურ ინსტიტუტს ჩამოაყალიბებს.

გარიგება, რომელიც მილანის საფონდო ბირჟაზე დაახლოებით 50 მილიარდ ევროდ (58 მილიარდი დოლარი) ფასდება, პოტენციურად UniCredit-ს აჯობებს. Banco BPM-ის პროგნოზით, შერწყმა კომპანიის აქციაზე მოგებას 10%-ზე მეტით გაზრდის, ხოლო წლიური გადასახადამდე სარგებელი 1,1 მილიარდ ევროს გადააჭარბებს.

სტრატეგიული ნაბიჯი

Banco BPM-ის დირექტორთა საბჭომ, რომელშიც ბანკის მთავარი აქციონერის, ფრანგული Credit Agricole-ის წარმომადგენლებიც შედიან, გადაწყვეტილებას ერთხმად დაუჭირა მხარი. მხარეები „თანაბარი პარტნიორების შერწყმის“ მოდელს განიხილავენ, თუმცა დეტალები ჯერჯერობით არ გასაჯაროებულა.

შეგახსენებთ, რომ Banco BPM-ი MPS-ის აქციონერი 2024 წლის ნოემბრიდან გახდა, მას შემდეგ, რაც იტალიის მთავრობამ ადრე სახელმწიფო დახმარებაზე მყოფი ტოსკანური ბანკის რეპრივატიზაცია დაასრულა.

კონკურენცია და ბაზრის რეაქცია

აღნიშნული გარიგება შესაძლოა იტალიურ საბანკო სექტორში შერწყმებისა და შესყიდვების ახალი ტალღის დასაწყისი გახდეს. წინა წელს დარგში საკმაოდ აქტიური პერიოდი დაფიქსირდა, თუმცა UniCredit-ი აქტიურად ცდილობდა მსგავსი გარიგებების შეფერხებას.

კერძოდ, 2025 წლის ივლისში UniCredit-ის მიერ Banco BPM-ის შეძენის მცდელობა ჩაიშალა. მიუხედავად იმისა, რომ ეს მცდელობა წარუმატებელი აღმოჩნდა, მან გარკვეული პერიოდით შეაფერხა Banco BPM-ის ალტერნატიული სტრატეგიული ნაბიჯები.

ამ დროისთვის MPS-ს ოფიციალური კომენტარი არ გაუკეთებია. წყაროების ცნობით, ბანკის დირექტორთა საბჭო უახლოეს დღეებში შეიკრიბება, სადაც საკითხის დეტალურ განხილვას გეგმავენ.