ფედერალური რეზერვის მომავალი თავმჯდომარე, კევინ უორში, ცენტრალურ ბანკში „რეჟიმის ცვლილების“ შესახებ საუბრობს. ეს განცხადება ბაზარზე უკვე იწვევს ვარაუდებს საპროცენტო განაკვეთების, საკადრო პოლიტიკისა და ბანკის მუშაობის ფუნდამენტური პრინციპების ცვლილების შესახებ. თუმცა, ცვლილებების არსი გაცილებით უფრო ტექნიკური და ამავდროულად, მასშტაბურია.

ფინანსური სისტემის „სანტექნიკა“

უორშის გეგმები უკავშირდება აშშ-ის ეკონომიკის ფინანსური „სანტექნიკის“ გადააზრებას. საუბარია 18 წლის განმავლობაში კრიზისებთან ბრძოლის შედეგად დაგროვილ 6.8-ტრილიონიან ბალანსზე. ექსპერტები და ყოფილი თანამდებობის პირები მიიჩნევენ, რომ უორში შეეცდება, ფედერალურმა რეზერვმა ყოველდღიურ საბაზრო პროცესებში ნაკლები მონაწილეობა მიიღოს და ჩარევის წესები უფრო გამჭვირვალე გახადოს.

2008 წლის ფინანსურ კრიზისამდე ფედერალური რეზერვის ბალანსი დაახლოებით 800 მილიარდი დოლარი იყო. პანდემიისა და სხვადასხვა კრიზისის ფონზე, ეს მაჩვენებელი 9 ტრილიონამდეც კი გაიზარდა. ამჟამად ბანკის აქტივები აშშ-ის მთლიანი ეკონომიკის 23%-ს შეადგენს, რაც კრიზისამდელ პერიოდთან შედარებით შვიდჯერ მეტია.

ახალი სტრატეგიის გამოწვევები

TS Lombard-ის მთავარი ეკონომისტი სტივ ბლიცი ვარაუდობს, რომ უორშის მმართველობის პირობებში ფედერალური რეზერვი აქცენტს არა მხოლოდ ფედერალურ განაკვეთზე, არამედ „რეპო“ ბაზარზე გააკეთებს. ეს მოკლევადიანი დაფინანსების სისტემაა, რომელიც სახაზინო ბაზრის გამართულ მუშაობას უზრუნველყოფს.

„რეპო განაკვეთი შეიძლება გახდეს პოლიტიკის მთავარი ინსტრუმენტი“, - აღნიშნავს ბლიცი.

თუმცა, ცვლილებებს წინააღმდეგობა უკვე გამოუჩნდა. ფედერალური რეზერვის მმართველი საბჭოს წევრი მაიკლ ბარი მიიჩნევს, რომ ბალანსის აგრესიული შემცირება საფრთხეს შეუქმნის საბანკო რეზერვებს და ფინანსურ სტაბილურობას. მისი აზრით, ბალანსის ზომაზე მეტად, მნიშვნელოვანია მისი სტრუქტურა და შემადგენლობა.

რა იქნება შემდეგ?

ეკონომისტების უმეტესობა თანხმდება, რომ უორში ამ ცვლილებებს ნელა და ფრთხილად განახორციელებს. „ეს არ არის დღის წესრიგის პირველი საკითხი, ეს უფრო საშუალოვადიანი პროექტია“, - აცხადებს Wrightson ICAP-ის მთავარი ეკონომისტი ლუ კრენდალი. ბაზარი კი დაძაბული აკვირდება, თუ როგორ შეცვლის ეს პროცესები იპოთეკურ განაკვეთებსა და სახაზინო ობლიგაციების შემოსავლიანობას.